Autori i shumë librave mbi mafian italiane e më gjerë, njëri prej pak zërave ende të lirë e të pacensuruar, Roberto Saviano nuk ka përtuar ta drejtojë gishtin mbi Britaninë si vendi më i korruptuar në botë.
Nën mbrojtje të vazhdueshme policore për shkak të shkrimeve të tij dhe të kërcënimeve për të, italiani 36-vjeçar ka marrë pjesë në një veprimtari të përvitshme në Uells, të quajtur Hay Literary Festival.
“Nëse ju pyes se cili është vendi më i korruptuar në tokë,” u ka thënë ai të pranishme kur i është dashur ta marrë fjalën në këtë aktivitet, “ju mund të më thoni se është Afganistani, mbase Greqia, Nigeria, jugu i Italisë, dhe unë do t’ju them se është Mbretëria e Bashkuar!”
“Nuk është burokracia, nuk është policia, nuk është politika,” e ka vijuar idenë e tij ai, “por i korruptuar është kapitali financiar. 90 për qind e poseduesve të kapitalit në Londër i kanë selitë e tyre qendrore jashtë vendit.”
Njëkohësisht gazetar, shkrimtar e eseist, Saviano ka shkuar më tej: “Xherzi (Jersey) dhe Kajmani (Cayman) janë portat hyrëse për kapitalin kriminal në Europë, dhe Mbretëria e Bashkuar është vendi që e lejon këtë.”
“Kjo është arsyeja pse ka rëndësi, pse është aq thelbësore për mua të jem këtu sot dhe të flas me ju, sepse dua t’ju them, kjo ka të bëjë me ju, kjo ka të bëjë me jetën tuaj, kjo ka të bëjë me qeverinë tuaj!”
Saviano ka prekur dhe çështjen e Brexit-it, duke argumentuar se dalja nga BE-ja do ta ekspozonte akoma më tepër Britaninë karshi krimit të organizuar. /tesheshi.com/
