Brazili do të ketë mundësi të shtunën të marrë hak ndaj Gjermanisë për atë humbje të thellë të dy viteve më parë në gjysmëfinalen e Kupës së Botës.
Dy përfaqësueset olimpike i kanë kaluar me sukses gjysmëfinalet respektive, të luajtura të mërkurën, për t’u ndeshur dy ditë më pas në finalen e shumëpritur.
Të zotët e shtëpisë duken më të avantazhuar, veç faktit se nuk e kanë fituar asnjëherë medaljen e artë në futboll në olimpiada.
Brazili u ndesh në gjysmëfinale me Hondurasin, duke fituar 6-0. Neymar e tundi rrjetën kundërshtare pas vetëm 15 sekondash, duke shënuar golin më të shpejtë në historinë e Lojërave Olimpike. Sulmuesi i Barcelonës do të shënonte dhe një tjetër gol me 11-metërsh në fund të lojës.
Gabriel Jesus shënoi dy herë, e nga një gol shënuan dhe Marquinhos e Luan.
Në gjysmëfinalen tjetër, Gjermani mposhti 2-0 Nigerinë. Golat për gjermanët u shënuan në dy ekstremet e lojës. Fillimisht realizoi Klostermann në minutën e 9-të, pasuar nga Petersen, që e thelloi rezultatin në minutën e 89-të.
Finalja mes Brazilit dhe Gjermanisë do të luhet të shtunën, në 22:30, në stadiumin “Maracana”. Ndeshja për medaljen e bronztë është në të njëjtën ditë, në orën 18:00, dhe do të vërë përballë Nigerinë me Hondurasin. /tesheshi.com/
