Incidente të rënda shpërthyen pasditen e së hënës në Koçan të Maqedonisë, aty ku ndodhi një tragjedi me 59 viktima të cilët u shuan nga zjarri në një diskotekë. Ishte një protestë e studentëve dhe nxënësve për të nderuar të vdekurit e në të njëjtën kohë, një tubim i madh proteste u zhvillua dhe në kryeqytetin Shkup.
Sipas mediave të Maqedonisë së Veriut, protestuesit në Koçan filluan të hedhin vezë dhe shishe në bashkinë e qytetit, duke thyer dyert dhe dritaret, duke kërkuar përgjigje nga autoritetet përkatëse për tragjedinë që tronditi qytetin. Ata kërkuan të takohen me kryetarin Ljubço Papazov, i cili tashmë ka dhënë dorëheqjen, por u ndaluan nga Policia.
Më pas turma u nis drejt lokalit të dytë të pronarit të “Pulse”, diskotekës që u bë varr për 59 persona. Protestuesit thyen xhamat e lokalit.
Në Shkup, ishin disa mijëra studentë dhe nxënës që u mblodhën në sheshin e universitetit shtetëror “Kirili dhe Metodi”.
Studenti su u kampusu Univerziteta Kiril i Metodij u Skopju, zapalili sveće za 59 lica koja su poginula u požaru u diskoteci Puls u Kočanima. pic.twitter.com/7pcAszi3pl
— vidivamo (@vidivamo) March 17, 2025
Të mbledhurit nënshkruan librin e ngushëllimeve dhe ndezën qirinj në kujtim të viktimave, ndërsa njoftuan se tubime të ngjashme do të mbahen çdo ditë deri më 21 mars.
Në këtë tubim në Shkup mori pjesë edhe ministrja e Arsimit e Maqedonisë së Veriut, Vesna Janevska.
Në qytetin e Koçanit mijëra banorë, në një klimë pikëllimi dhe dhimbjeje të thellë dhe në mot me shi, janë vërshuar që nga mëngjesi drejt parkut të qytetit, ku firmosin edhe librin e ngushëllimeve dhe ndezin qirinj në kujtim të të vdekurve, ndërsa kërkojnë llogari dhe drejtësi për ngjarjen tragjike. Pasdite, të mbledhurit filluan një marshim protestues nëpër rrugët kryesore të Koçanit. Marshimi përfundoi para bashkisë.
Kryeministri i Maqedonisë së Veriut dhe lideri i partisë në pushtet VMRO-DPMNE, Hrstijan Mickoski, nga radhët partiake të të cilit vjen edhe kryetari i dorëhequr i Komunës së Koçanit, vlerësoi veprimin e këtij të fundit për të dhënë dorëheqje, megjithëse tha se nuk ka përgjegjësi për incidentin tragjik. /tesheshi.com/
