Kanë rinisur bombardimet ajrore në veri të Sirisë, në Halep, aty ku është tashmë epiqendra e konfliktit më shumë se pesëvjeçar sirian.
Sipas raportimit të BBC-së, që u referohet aktivistëve në terren, këto janë bombardimet më të mëdha gjatë ditëve të fundit.
Observatori Sirian për të Drejtat e Njeriut ka njoftuar se së paku 25 civilë u vranë nga sulmet ajrore të së martës, dhe mes të vrarëve gjenden dhe fëmijë.
Këto bombardime pasojnë një qetësim të shkurtër të luftimeve, për t’i lejuar civilët të largohen nga pjesa lindore e Halepit, e cila është nën kontrollin e kryengritësve.
OKB-ja ka paralajmëruar ditë më parë se pjesa lindore e Halepit mund të shkatërrohet plotësisht brenda dy muajve.
Mes tensionit ndërkombëtar mbi konfliktin sirian, presidenti rus anuloi një vizitë të planifikuar për në Francë. Në të njëjtën kohë, mes palëve që mbajnë anë të ndryshme në konfliktin sirian vijojnë polemikat dhe akuzat e ndërsjellta. /tesheshi.com/
