Nga Blendi Gashi
Riformatimi i shumëpërfolur qeveritar në kabinetin “Mustafa”, edhe pas disa muajsh, ende zyrtarisht nuk është jetësuar.
Arsyeja pse nuk po ndodh një gjë e tillë është se në të vërtetë nuk do të ketë fare riformatim, pra largim të ministrave të dështuar, por vetëm lëvizje të ministrave e zv.ministrave nga një dikaster qeveritar në një tjetër.
Deklarimet e dy kryetarëve të partive në koalicion, Kadri Veselit të PDK-së e Isa Mustafës së LDK-së, se “po, do të ndodhë riformatimi” është thjesht nj demagogji.
Emrat e mëposhtëm të përmendur nga mediat si ministra eventualë të rinj, sidomos ato që vijnë nga radhët e PDK-së, tregojnë se nuk bëhet fjalë për riformatim klasik ki bie në sy cilësia si prioritet.
Emërimi eventual i deputetes Blerta Deliu-Kodra në postin e ministres së Integrimeve, edhe pse një emër i ri që më parë nuk ka udhëhequr ndonjë ministri, prapëseprapë nuk mund të quhet riformatim por vetëm mbushje vakante e një pozite ministrore që la muaj më parë Bekim Çollaku i cili kaloi si këshilltar i presidentit Hashim Thaçi.
Poashtu emërimi eventual i Ferat Shalës si ministër i Mjedisit dhe Planifikimit Hapësinorë nuk është kurrfarë rifreskia qeveritare apo vendosje e një profesionisti në pozitën e caktuar.
Siç dihet, Shala aktualisht mban postin e zv.ministrit të Mjedisit, andaj emërimi si ministër nuk është riformatim, por njëjtë si në rastin paraprak mbushje vakte e pozitës së ministrit të Mjedisit, pasi kohë më parë është lënë bosh nga Ferid Agani i cili dha dorëheqje për shkak të drejtësisë (një rast i rrallë që një politik në Kosovë jep dorëheqje).
Po ashtu, kalimi i njerëzve të PDK-së që mbajnë aktualisht pozita zv.ministri nga një ministri në tjetrën është dëshmia e radhës se nuk bëhet fjalë për kurrfarë ndryshimi, por është thjesht mashtrim i qytetarëve dhe rehatim i njerëzve partiakë për të marrë një pagë shtetërore.
Zyrtarja e PDK-së, Anila Statovci aktualisht mban pozitën e zv.ministres së Arsimit, dhe e njëjta ka konfirmuar ditë më parë se do të kalojë si zv.ministre në ministrinë e Integrimeve në vend të Ramadan Ilazit që dha dorëheqje ditë më parë.
Pra, edhe ky rast tregon se s’bëhet fjalë për riformatim, por lëvizje nga një dikaster qeveritar në tjetrën.
“Mos-rifromatimi thelbësor i qeverisë sinjal se PDK po përgatitet për zgjedhje të parakohshme”
Të njëjtën gjë e thonë edhe burime të portalit tesheshi.com brenda PDK-së se partia e Kadri Veselit nuk është aspak e interesuar për rifomartim dhe të sjellë emra të rinj e profesionalë në kabinetin qeveritar pasi interesimi i këtij subjekti janë shkuarja në zgjedhje të reja.
“Nuk ka reformatim të qeverisë siç po flitet, ka veç emërime në vende vakante dhe ndërrime formale të ministrave e zv.ministrave nga një vend në vendin tjetër. Edhe kjo është një nga shenjat se PDK-ja është duke u përgatitur për zgjedhje të jashtëzakonshme. Pra, s’ka riformatim. Ka emërim në pozitën vakante të Ministrisë së Integrimeve, ka emërim në Ministrinë e Ambientit nga ushtrues detyre në pozitën e minsitrit, dhe lëvizje të zv.ministrave nga një ministri në tjetrën”, thotë burimi.
Ndërsa nga radhët e LDK-së, ministrat që janë përmendur se mund të largohen janë; Skënder Hyseni ministër i Punëve të Brendshme (është raportuar se do të zëvendësohet nga deputeti Anton Quni), Hikmete Bajrami ministre e Tregtisë dhe Industrisë (ende nuk është përmendur ndonjë emër që mund ta zëvendësojë) dhe Kujtim Shala ministër i Kulturës (raportohet se do të zëvendësohet nga Vlora Dumoshi).
Përkundër raportimeve të tilla, për çështjen në fjalë ende nuk është deklaruar kreu i LDK-së, njëherit kryeministri Isa Mustafa, i cili pritet ta japë fjalën përfundimtare. /tesheshi.com/
