Një javë pasi priti në takim krerët e Aleancës Kundër Importit të Plehrave, presidenti Nishani ka pritur këtë të enjte të kundërtët e tyre: përfaqësues të Industrisë së Riciklimit dhe anëtarë të Shoqatës së Ricikluesve, të cilët i kërkuan kreut të shtetit që ta dekretojë ligjin për mbetjet.
Siç thuhet në njoftim, ricikluesit në takim shpjeguan efektet negative që do të vinin nga mosdekretimi. Sipas tyre, duke lënë mënjanë disinformimet dhe tentativat për përdorim politik, qëllimi dhe interesi i industrisë të riciklimit në vend nuk është thjesht aspekti ekonomik dhe zhvillimor, por edhe ai i ruajtjes së mjedisit.
Nga ana tjetër, thuhet se presidenti vuri në dukje se ka shumë nevojë, që për çështje të tilla të ndjeshme që përfshijnë shumë dimensione si ato të biznesit, ekonomik, strukturor, mjedisor, etj., zëri i aktorëve të ndryshëm të përfshirë të jetë më i fuqishëm.
“Çështje kaq thelbësore e të ndjeshme nuk duhen politizuar në mënyrë që pastaj ato të mos dështojnë”, ka thënë Nishani.
Presidenca sqaron se kreu i shtetit garantoi pjesëmarrësit se ligjin në fjalë do ta trajtojë me shumë seriozitet dhe se do të mbajë një qëndrim sa më të argumentuar në raport me të, duke vazhduar ndërkohë edhe konsulta të mëtejshme me individë ekspertë të fushës. /tesheshi.com/
