Nga Ylli Pata
Ka hasur në kundërshtimin e parë edhe pse jo publik, jo vetëm të opozitës por edhe të mazhorancës, projktligji i ri për pushtetin vendor, i cili është hartuar nga qeveria.
Sipas këtij drafti, këshilltarët e bashkisë nuk do të paguhen, por do të marrin vetëm dieta udhëtimi apo edhe hoteli nëse janë larg. Bie fjala, në një bashki të thellë si ajo e Shkodrës, një këshilltar nga Dukagjini për të udhëtuar në qytet për mbledhje, përveç rrugës do të harxhojë dhe fjetje. Kurse ngrënien e ka nga xhepi.
Kjo ka shkaktuar një irritim, pasi disa e konsiderojnë edhe si shkelje të autonomisë vendore.
Nardi Olli, kreu i këshilltarëve të PD-së në bashkinë e Tiranës, e cilësoi këtë draft të qeverisë si një shkelje e të drejtës së pushtetit vendor për ta zgjidhur vetë këtë çështje me vendim këshilli.
Ndërkaq, siç mësohet, Shoqata e Këshilltarëve nga të gjitha partitë, po lobon për të siguruar një peticion që do ta kundërshtojë draftin në Kuvend.
Hartuesit e projektligjit, që është natyrisht ministria e drejtuar nga Blendi Çuçi, theksojnë në relacionin shoqërues se “Ky ndryshim është në përputhje me përcaktimet e Kartës Evropiane të Qeverisjes Vendore e cila evokon funksionin qytetar dhe komunitar të këshilltarëve si përfaqësues të një kauze publike dhe jo si “funksionar publik” që kryen funksionet kundrejt një shpërblimi për punë”.
Sipas ligjit, këshilltarët paguhen me 10 përqind të pagës së kryetarit dhe, në varësi të numrit të mbledhjeve në muaj (duhet të janë më e pakta katër), e nxjerrrin një rrogë deri diku të preferueshme. Dhe në këtë kohë krize, dëshira për të qenë këshilltar më shume se për kontribut politik, përkthehet dhe si një bonus i mirë financiar. Tani që ky bonus do hiqet, pakkush do ndihet mirë që është zgjedhur këshilltar bashkiak. /tesheshi.com/
