Eshtë publikuar sot renditja e FIFA-s për muajin tetor, që paraqet klasikimin e përfaqësueseve në nivel botëror.
Siç edhe u paralajmërua një ditë më parë, Shqipëria ka humbur shtatë pozicione, duke u renditur tanimë në vendin e 47-të.
Përfaqësuesja e Shqipërisë fitoi 0-2 gjatë këtij muaji me Lihtenshtajnin, e po me këto shifra humbi ndaj Spanjës në “Loro Boriçi”.
Ngushëllues është fakti që pas mbeten gjithsesi ekipe të tilla përfaqësuese si Danimarka, Sllovenia, Rusia, Mali i Zi e Skocia.
Kosova, edhe pse i humbi të dy takimet e tetorit, ka ngjitur katër shkallë në renditjen e FIFA-s, duke e pozicionuar e 164-ta.
Nëntë vende ka humbur Maqedonia, që renditet e 155-ta.
Argjentina mban vendin e parë në renditjen e muajit tetor. Rritje me nga një pozicion kanë njohur Gjermania dhe Brazili, në vend të dytë e të tretë në publikimin e sotëm.
Belgjika ka zbritur me dy vende, aktualisht e katërta. Dhjetëshen e parë të renditjes së FIFA-s e plotësojnë Kolumbia, Kili, Franca, Portugalia, Uruguaji dhe Spanja. /tesheshi.com/
