Policia e Shtetit ka bërë me dije pezullimin nga detyra e më pas ndjekjen penale të dy efektivëve policorë, të cilët ushtruan dhunë (kështu thuhet zyrtarisht), por duhet thënë se u përlanë fizikisht me një shtetase, edhe pas këmbimit të fjalëve fyese. Ka reaguar menjëherë shefi i qeverisë Rama, duke falenderuar qytetarin që vuri në punë videon e celularit, për të kapur atë çast. Fillimisht duhet thënë se nuk është e sigurt nëse, qytetari e bëri këtë nga një vetëdije të lartë qytetare, apo me idenë për të rregjistruar diçka që më pas t`ia shiste gjindjes për gallatë. Ndërsa sa i përket vendimit të strukturave të larta të Policisë për t`i ndëshkuar efektivët e saj që, siç thuhet, kanë cënuar imazhin e rrobës që përfaqsojnë, kjo është mjaft e drejtë. Shtetasja që i pagëzoi policët si majmunë, e madje dhe i pështyu pasi këta të fundit e etiketuan me një xanxë të rëndë për moralin e një femre, për shumëkënd e kanë merituar atë lloj reagimi, por polici duhet dhe të durojë mbi të gjitha gjatë ushtrimit të detyrës, teksa i bie të merret me turlilloj tipologjish njerëzore. Ai është për ta zbatuar ligjin ftohësisht, me durim prej derri si i thonë, pa i lënë emocionet që ta marrin më vete; siç ndodh që durojnë në raste protestash, kur i vënë përpara me huj e druj. Kështu duhej të duronin dhe qitësit e 21 janarit – gjithnjë nëse shkrepjet nuk i bënë më urdhër nga lart. Eshtë lloji i profesionit që e ka këtë risk, si çdo profesion tjetër, ku më pak e ku më shumë. Më i rëndë akoma ishte rasti i Korçës, ku i riu rrihej si qen në mes të rrugës, ndërsa policit as të qënit në publik nuk ia mbante dorën, si shenjë droje se mos i merr erzin vetes duke përfunduar në smartfonat e miletit, e më pas direkt në TV, e rrjedhimisht në…zhveshje!
Sakaq, jemi mësuar të shohim policë që trajnohen e japin shfaqje se si e kapin apo e çarmatosin një kriminel, por kurrë se si dikush i fyen, i poshtëron, e ata në emër të ligjit dhe etikës, durojnë. Çmendurisht. Nuk e dijmë nëse ekziston ky lloj trajnimi në rradhët e forcave të Rendit?! A ekziston ndonjë pikë e normave që duhen kapur, ku dikush i thotë një polici kafshë ose majmun, e ky nuk ja kthen me të njëjtat ofeza duke i shoqëruar dhe me një lapër turinjve, por duron, për nder të ligjit dhe etikës në ushtrimin e detyrës?!
Dhe diçka: Policët tanë nuk janë jashtëtokësorë me veti negative, ata jemi dhe ‘ne’, që mundet mos ishim më të mirë nëse fati do na çonte të ishim policë! Mjaft që ata janë pjesë e natyrshme e shoqërisë sonë, “prodhim” i yni! /tesheshi.com/
