Komuniteti rom në Korçë ndihet i nëpërkëmbur, deri në atë pikë sa kanë vendosur të bojkotojnë pjesëmarrjen e tyre në institucionet vendore. Është fjala për një qytet ku ata përbëjnë një komunitet shumë të madh.
Arben Kosturi, kryetar i shoqatës së romëve “Disutni Albania” në Korçë, ka dalë me një deklaratë me anë të cilës i bën opinionit, e po ashtu qeverisjes qendrore dhe posaçërisht kryeministrit Rama, se ç`po ngjet me ta kohët e fundit, duke vënë në shënjestër të akuzave PS-në lokale dhe eksponentë të atyshëm:
Diskriminimi dhe urrejtja racore nuk po na lejon integrimin e shoqatave tona rome dhe egjiptiane në shoqërinë shqiptare. Kjo gjë ndodh prej vitesh, por që nga viti 2007 e këtej, u thellua edhe më tepër, kur në të vërtetë duhej të kishte ndodhur e kundërta. Bashkia e Korçës vijon të mbajë qëndrim refraktar ndaj nesh. Në këtë institucion nuk kemi asnjë lloj përfaqësimi edhe pse numërojmë më shumë se 20.000 banorë. Pasoja: po përballemi me probleme të shumta ekonomiko-sociale, me mungesë punësimi, strehimi etj. Romët dhe egjiptianët e Korçës kanë marrë arratinë drejt vendeve të Bashkimit Europian, kanë filluar të ndihen të lodhur dhe të shqetësuar.
Për këtë arsye, gjatë një konference të organizuar nga “Disutni Albania”, ku ishin të pranishme shoqatat tona, dolëm me një vendim të prerë: shoqatat rome dhe egjiptiane do të ndërpresin çdo bashkëpunim me Bashkinë e Korçë dhe do të bojkotojnë çdo aktivitet dhe veprimtari të Bashkisë që ka lidhje me komunitet tona. Bojkotimi do të vazhdojë për aq kohë sa drejtuesit e Bashkisë Korçë të heqin dorë nga diskriminimi dhe urrejtja racore ndaj nesh. Vendimi ynë do t’u përcillet për dijeni deputetes rome të Parlamentit Europian, Soraya Post eurodeputetëve të tjerë me të cilat jemi në bashkëpunim të përhershëm.
Akti më i turpshëm ka të bëjë me punësimin e 300 romëve dhe egjiptianëve gjatë muajit të fushatës elektorale, ku pas përfundimit të zgjedhjeve dhe pas marrjes së votës së tyre, të gjithë u lanë pa punë. Sot këto familje ose kanë marrë rrugët e emigrimit, ose i gjen rrugëve të Korçës duke lypur bashkë me fëmijët e tyre. Gjendja ekonomike e tyre është skandaloze. E njëjta gjë ndodh edhe me strehimin, me asistencën sociale etj, ku dy komunitetet tona prej vitesh ndihen të diskriminura. Urrejtja racore nuk mund të fshihet
Duke filluar që nga zgjedhjet vendore të vitit 2007 dhe veçanërisht gjatë zgjdhjeve të vitit 2011 dhe 2015 nga ana e Partisë Socialiste dhe nga vetë z. Edi Rama na u premtua se do të kishim kandidatin tonë për Këshillin Bashkiak, ndaj për këtë arsye dola si kandidat i komunitetit rom. Por çfarë ndodhi? Partia Socialiste më të cilën bashkëpunuam, bëri fushatë kundër meje: “Mos votoni Arben Kosturin, ai nuk ka gjë në dorë, votoni Partinë Socialiste, që të zgjidhen hallet tuaja”. Mashtroi me 300 punësimet e përmendura më sipër, ku nuk mungoj as blerja e votës.
Megjithatë, edhe pse pa asnjë përkrahje nga PS-ja sigurova një numër të konsiderueshëm votash dhe përsëri mbetëm të papërfaqësuar, kurse një militantja e PS-së, edhe pse mori vetëm 200 vota sot është drejtoreshë. Diskriminimi dhe urrejtja racore po na ndjek në çdo hap.
Këto ishin dhe arsyet pse dolëm me vendimin e bojkotimit dhe të mosbashkëpunimit, të cilat zyrtarisht do t’ia paraqesim së shpejti Bashkisë Korçë me shkrim. Ku përveç sa më sipër, do t’i kërkojmë që në rajonin nr 3 ku banojnë romet dhe egjiptianët të kemi përfaqësuesit tanë për çështjet e punësimit, strehimit dhe ndihmës ekonomike, me qëllim për të mos lejuar nëpërkëmbjen tonë të mëtejshme.
Shkruan kështu Arben Kosturi në deklaratën e tij.
/tesheshi.com/
