Realiteti virtual mund t’u ndihmojë pacientëve me sulm në tru të shërohen duke i bërë të besojnë se gjymtyra e tyre e prekur nga sulmi është më e saktë se sa që është në të vërtetë.
Disa hulumtues në Spanjë kanë zbuluar se nëse gjymtyra e prekur nga sulmi bëhet të duket më efektive në ekran, kjo e rrit mundësinë që pacienti ta përdorë gjymtyrën në jetën e përditshme. Kjo është shumë me rëndësi ngase viktimat e sulmit në tru shpeshherë nuk e përdorin sa duhet gjymtyrën e tyre të prekur nga sulmi, gjë që e dobëson gjymtyrën edhe më tepër.
Gjatë studimit të 20 pacientëve me sulm në tru, hulumtuesit nganjëherë e përmirësonin paraqitjen e gjymtyrës së dëmtuar të pacientit, duke e bërë të dukej më e shpejtë dhe më e saktë, mirëpo pa e ditur pacienti.
Sipas udhëheqësit të hulumtimit Belen Rubio, pas këtyre episodeve ku gjymtyrët u bënë të duken më efektive, pacientët filluan t’i përdornin gjymtyrët më shumë.
“Çuditërisht, vetëm 10 minuta të përmirësimit të paraqitjes së gjymtyrës mjaftuan për të nxitur ndryshime të dallueshme në shpeshtësinë e përdorimit spontan të gjymtyrës së dëmtuar,” tha zonja Rubio nga Laboratori i Sistemeve Sintetike, Perceptive, Emotive dhe Njohëse në Universitetin Pompeu Fabra në Spanjë.
Para eksperimentit me realitetin virtual kishte mundësi mesatare prej 35% që 20 pacientët ta zgjedhnin krahun gjysmë të paralizuar për të marrë diçka mu para vetes, ndërsa pas eksperimentit kjo shifër u ngrit në 50%, që është e njëjtë edhe te personat e shëndetshëm.
Profesor Paul Verschure, autori i këtij studimi dhe udhëheqësi i grupit kërkimor, tha për faqen e internetit BBC News se kishin planifikuar vrojtime të mëtutjeshme për t’i parë efektet e këtij eksperimenti te pacientët në përditshmërinë e tyre.
Shoqata e Sulmit në Tru ka thënë se rehabilitimi fizik mund t’i ndihmojë viktimat e sulmit në tru që ta shërojnë trurin.
“Rezultatet e këtij studimi model japin të kuptohet se fuqia e realitetit virtual mund të përdoret në të ardhmen për t’i ndihmuar pacientët e sulmit në tru që ta ndërtojnë vetëbesimin për ta përdorur gjymtyrën e tyre të dobësuar, dhe për ta promovuar shërimin e tyre. Prova më të mëdha kërkohen në mënyrë që ta vërtetojmë se a është e mundur kjo,” tha Dr. Shamim Quadir, menaxheri i komunikimeve kërkimore në këtë shoqatë.
