Nga Mensur Krasniqi
“Moska zyrtare kërkon falje për pengimin e integrimit të Republikës së Maqedonisë në aleancat Euro-Atlantike”.
“Misioni diplomatik i BDI-së përfundon me sukses edhe në Siri ku palët në konflikt vendosin armëpushim, me qëllim që t’i hapin Maqedonisë rrugën për anëtarësim në NATO dhe Bashkimin Evropian. E gjithë kjo falë angazhimeve personale të krerëve të BDI-së, Ali Ahmeti dhe Artan Grubit”.
Këto janë disa nga statuset e shumta që vërshuan rrjetet sociale menjëherë pas deklaratës së kreut të BDI-së, Ali Ahmeti, i cili tha se integrimet euroatlantike të Maqedonisë kanë dështuar për shkak të luftërave në Ukrainë, Siri dhe Irak. Gazetarë, analistë, intelektualë dhe qytetarë të shumtë kanë bërë gallatë me Ahmetin duke ironizuar edhe dështimet e tjera të BDI-së.
“Së pari, nuk është luftë Ukrainë – Rusi, por agresion rus në Ukrainë. Toni neutral i lolo’s nuk duhet të na befason. Është vazhdimësi е politikës të qeverisë së tij e cila asnjëherë nuk dënoi agresionin rus në Ukrainë. Së dyti, agresioni në Ukrainë, lufta në Siri dhe invazioni i karkalecave në Patagoni nuk penguan Malin e Zi të anëtarësohet në NATO”, shkruan në profilin e tij në Facebook analisti Arsim Zekolli.
Në një postim tjetër, regjisori dhe ish-ministri Sulejman Rushiti, ka shtuar se Maqedonia nuk është anëtarësuar në NATO për shkak të luftës në Ukrainë, Siri, si dhe për shkak të Luftës së Yjeve. Politologu Muhamed Jashari, në mënyre ironike ka shkruar se bombardimet ruse në Gouta-n lindore të Damaskut, në Hama dhe Deir Zour, ndërhyrja saudiane në Jemen, shkelja e armëpushimit në Ukrainë, luftimet e herë pas hershme ndërmjet Indisë dhe Pakistani në shtator të këtij viti, luftimet e grupeve rebele në Libi, janë ndër shkaqet kryesore që ne sot nuk mundemi me hy në NATO as në BE, ani pse Mali i zi ka marrë ftesë për anëtarësim. Në mesin i ironive kishte edhe pyetje të llojit: Nuk më ndizet makina, kush i ka fajet?
Ahmeti, nuk është i pari i cili bëhet objekt i talljeve në internet. Para tij, krahu i tij i djathtë, shefi i kabinetit Artan Grubi, kishte bërë një foto selfie para një përmendoreje maqedonase të projektit Shkupi 2014, ndërsa e kishte publikuar si foto me Nexhat Agollin. Pas kësaj shumë qytetarë bënin foto të ngjashme duke ironizuar Grubin. /tesheshi.com/
