Gjykata e Hagës ka dhënë më në fund vendimin e saj: dënim i përjetshëm për Ratko Mlladiç! Kjo ndodhi ndërkohë që i akuzuari ishte larguar nga salla duke u mbyllur në tualetin e madh të institucionit që gjykon Krimet kundër Njerëzimit.
Janë dashur 25 vjet pritjeje, 14 në arrati dhe 4 vjet në proces; 300 dëshmitarë, 10 mijë elemente prove; si dhe orë e orë për të dëgjuar deliret e tij, veçon ai: “kam mbrojtur Europën nga Islami”.
Sot ishte ora e të vërtetës për generalin e kobshëm të vrasjes dhe zhdukjes masive të qindra civilëve, ku veçojnë të masakruarit e Srebrenicës.
Por Mlladiç sërish është përpjekur të shmanget nga përgjegjësitë e tij të tmerrshme: “nuk ka asnjë urdhër të shkruar nga unë”, ka thënë ai.
Avokatët e Mlladiç kanë synuar që ta bllokojnë procesin: “është sëmurë, duhet ta çojmë për kruim në Rusi”, ishte kërkesa e tyre.
Më në fund, shumë në fund drejtësia ka ardhur në momentin e saj final.
Në moshën 74-vjeçare, gjenerali serbo-boshnjak, Ratko Mladic, del para të gjithë opinionit botëror si “kasapi” që nga 1991 në 1995 martirizoi Sarajevën e “spastroi” të gjithë Bosnjën, me 100 mijë të vdekur dhe 2 milionë e 200 mijë të mbetur pa shtëpi.
Njeriu që në Srebrenicë urdhëroi masakrën më të madhe të paparë që nga Lufta e Dytë Botërore, më shumë se 8 mijë të vrarë, përfundimisht është dënuar me burgim të përjetshëm.
Edhe pse sentenca u vonua, madje edhe me episode qesharake, ku i dënuari u mbyll në mënyrë të palavdishme në tualet, gjykatësi e mori vendimin duke e lënë Mlladiçin jashtë.
Tre gjykatësit e Hagës, holandezi Alphons Orie, jugafrikani Bakone Moloto dhe gjermani Christoph Flugge u përqëndruan mbi genocidin në Srebrenicë dhe në 6 qytete të tjera, ku janë persekutuar muslimanët dhe kroatët; u përqëndruan tek bombardimi i Sarajevës, tek vrasjet nga snajperët dhe granatimin që shkaktoi 10 mijë të vdekur (1.500 ishin vetëm fëmijë), por edhe në pengëmarrja e kaskave blu të OKB-së.
Gjykatësit thanë se është e pamundur që të ekzaminojnë të gjitha tmerret, përdhunime, vrasje e krime të një lufte barbare, e padëgjuar në Europë që nga koha e nazizmit.
Mlladiç tentoi të duket si një ushtarak dinjitoz me xhaketë dhe kravatë, por në fund nuk i rezistoi të dëgjojë renditjen e krimeve të tij: u mbyll në banjo.
Lejla Deljanin, 37-vjeçare e mbijetuar e krimeve në Bosnjë ishte fëmijë kur u godit në kokë me plumb pushke në vitin 1992. Po shkonte të mbushte ujë, kur u qëllua nga snajperët.
“Është i pamjaftueshëm ky vendim për gjithë ato jetë të shkuara dëm”, thotë ajo.
Darko Mlladiç, i biri i ardhur nga Beogradi thirri: “Mlladiç është hero”, por njerëzit kthyen kokat. Drejtësia gjithsesi edhe pse e pamjaftueshme u dha…/tesheshi.com/
