Emrat “teknikë” që i solli Basha në tryezë Ramës si ministrat e rinj kujdestarë të zgjedhjeve ngrenë pikëpytje të mëdha për integritetin e tyre në punët që kanë kryer më parë dhe gjurmën që kanë lënë në zyrat e shtetit ku kanë shërbyer….
Lulzim Basha kishte shansin që të jepte modelin e parë të një “Republike të re” që ai aspiron me emrat e ministrave të rinj teknikë në prag të zgjedhjeve. Por nuk e bëri dot këtë. Secili prej emrave të propozuar u shoqërua me një CV të gjatë jetëshkrimi, të arsimimit dhe punëve që kishin bërë më parë, por ajo që u mungonte në këtë CV ishte integriteti profesional. Për çfarë mbahen mend këta individë në detyrat që kanë kryer më parë? A kanë bërë disa punë për të cilat u takojnë merita apo kanë lënë pas pikëpytje të mëdha për korrupsion?
Pse PD nuk i shoqëroi dot ministrat e rinj me CV meritash?!
Rasti i Helga Vukaj që do të jetë ministre financash e jep më së miri këtë përgjigje. Ajo është një emër i panjohur për publikun e gjërë, sepse ka qënë larg ekraneve të televizioneve, por si zv/drejtoreshë e kompensimit dhe kthimit të pronave ish-pronarëve ka lënë gjurmën e saj të pashlyeshme në kujtesën e të gjithë pronarëve që kanë pasur të bëjnë me të dhe zyrën e saj.
E mbani mend protestën e famshme në Orikum, ku qytetarët bllokuan rrugën në përpjekje për të ndaluar tjetërsimin e pronave të tyre në bregdet? Pronat e banorëve të fituara me ligjin 7501 iu kthyen “pronarëve të ligjshëm” dhe u dhanë leje ndërtimi në bregdet, ku për habinë e të gjithëve na doli pronar miku i ngushtë i djalit të kryeministrit Berisha, Rrahman Selmanllari.
Vetë Rama në fushatën e tij në këtë zonë, para se të bëhej kryeministër u shpreh për banorët e Orikumit se “…banorët që u gjendën përballë një bande grabitqarësh të ardhur këtu për t’ju rrëmbyer tokat dhe për të ndërtuar e për të bërë para jo vetëm në kurriz të banorëve, jo vetëm në kurriz të komunitetit, por në kurriz të gjithë vendit”.
Emri i saj si ministre sigurisht që ka acaruar nervat e socialistë, por jo pak dhe të shumë demokratëve. Burime nga PD-ja thonë se pikërisht për çështjen e pronave shumë familje të vjetra pronarësh të ligjshëm kanë bërë ankesa në drejtim të emrit të saj gjatë kohës që ka mbajtur detyrën e mbikqyrëses së kthimit të pronave për gjithë vendin. Vukaj, bashkë me drejtorin e AKKP-së, Tunxh Vatnikaj janë përballur dhe në gjyq për tjetërsimin e një prone në Spille.
Nga ana tjetër kemi një ministër të brendshëm ushtarak i cili është liruar nga ushtria sepse ka thyer disiplinën e ushtrisë. Për të mos folur për sjelljen e tij totalisht kundër asaj që njihet si “politikish korrekt” ku në artikutj e botuara tek RD-ja (organ zyrtar i Partisë Demokratike) u sulet me një nacionalizëm ekstrem fqinjëve tanë serbë dhe grekë.
Xhulieta Kërtusha, ministrja e re e Mirëqënies Sociale, ka qenë më parë drejtoreshë në agjencinë më problematike gjatë qeverisjes “Berisha”, OSSHE. Në kohën kur ajo administronte blerjen e energjisë, kjo kompani ishte pothuajse drejt falimentimit, e që më pas u privatizua nga CEZ, akt ë rezultoi t’i ketë sjellë shtetit shqiptar më shumë se 400 milionë euro dëm.
Ministre e re e Arsimit gjithashtu vjen një emër teknik që CV-në e saj jetësore e ka shumë të varfër. Por asnjë fjalë për meritat e saj në punët që ka bërë si mësuese, drejtoreshe shkolle apo “grua ambasadori”.
Ndoshta i vetmi emër me të vërtetë teknik mund të jetë ai i ministrit të Shendetësisë, Arben Beqiri, mjek dhe ish zv/rektor i Fakultetit të Mjekësisë, i cili gjithashtu vjen ashtu si kolegët si një njeri i afërt politikisht me PD-në. Por pak, shumë pak për të përcjellë mesazhin e një Republikë te re brenda kampit Rama. /tesheshi.com/
