Qeveria “Rama2”, e cila u publikua në mbledhjen e sotme të Asamblesë së PS-së, nga kryeministri Edi Rama, veç debateve politike në distancë që shkaktoi, duket se ka edhe një meritë, atë të bashkimit të opozitës.
PD dhe LSI në qëndrimet publike ishin në të njëjtën gjatësi vale duke shprehur kritika të forta për kabinetin qeveritar që do të drejtojë vendin nga shtatori.
Përbërja e qeverisë bashkoi edhe grupimet në PD, ku mbështetës dhe kundërshtarë të Lulzim Bashës, përmes rrjeteve sociale kanë shprehur të njëjtin qëndrim.
Por nisur nga ftesa publike që Rama i bëri Bashës për të vijuar zbatimin e marrëveshjes, deklaratë e cila deri më tani ka kaluar pa komente nga opozita, qofshin mbështetës apo kundërshtarë të kreut demokrat, mund të rikthejë në qendër të vëmendjes përplasjet mes demokratëve.
Gjithsesi qoftë edhe për një ditë, demokratët kanë lënë mënjanë përplasjet mes tyre dhe kanë konstatuar se kundërshtari real politik është Edi Rama dhe qeveria e tij. /tesheshi.com/
