Kryeministri Edi Rama vlerësoi sjelljen e opozitës gjatë seancës parlamentare të zgjedhjes së Gramoz Ruçit në postin e kryeparlamentarit Kryeministri Edi Rama.
Në një prononcim për mediat, pas seancës plenare, Rama tha se qëndrimi i PD-së për të marrë pjesë në Kuvend dhe për të votuar kundër është një sjellje normale.
Ndërsa, i pyetur nëse do të ketë marrëveshje të dytë pas marrëveshjes parazgjedhore, Rama deklaroi se nuk duhet pritur që të ketë marrëdhënie të mirë mes PD-së dhe PS-së.
“I kërkojmë opozitës që të merret vesh me ne. Të na kritikojë, të na godasë, por të japë dhe alternativën e saj. Dua të kuptoj nëse marrëveshja është gjallë apo ka vdekur, por dua të them që sot qëndrimi i PD-së ka qenë super korrekt”, tha Rama.
Teksa ka vlerësuar kreun e Shtetit Ilir Metën për dekretimin e tij si kryeministër, Edi Rama ka njoftuar se ditën e hënë do të ketë përsëri parlament, ku pritet të paraqesë programin e qeverisë.
“Falenderoja Presidentin e Republikës për shpejtësinë që ka reaguar duke më dekretuar për të qenë i pranishëm në seancën e ditës së hënë” tha Rama.
Ai sqaroi se gjatë prezantimit të programit të qeverisë shpreson që opozita të jetë në Kuvend, ndërsa shtoi i hapur për çdo sugjerim dhe kritikë që mund të vijë prej tyre.
Edhe kreu i sapozgjedhur i Kuvendit Gramoz Ruçi, në mbyllje të seancës njoftoi se me 11 shtator në seancën plenare, kryeministri do të paraqesë programin dhe përbërjen e kabinetit qeveritar.
“Më 11 shtator do jetë dita kur kryeministri do të paraqesë në Kuvend programin politik dhe përbërjen e kabinetin qeveritar”, tha Ruçi. /tesheshi.com/
