Kryeministri Edi Rama ka zgjedhur një fjalim para krerëv të policisë, për të shpjeguar dhe zbërthyer atë që konsiderohet si dështim i qeverisjes së tij në tre vjet, sidomos në planin ekonomik.
Me tezën se “njeriu nuk është i detyruar të jetë i vëmendshëm ndaj asaj që nuk ndodh” e se “qeveria gjykohet zakonisht për atë që bën e jo atë që nuk bën”, Rama tha se në tetor të 2103-ës, qeveria e tij ka arritur që të shmangë një katastrofë financiare ku vendi rrezikonte të mbetej pa rroga dhe pensione.
Ai bëri krahasimin me shumë krime që policia arrin t’i shmangë, ndërkohë që në media zë vend vetëm krimi që ndodh. Rama i është kthyer dhe njëherë faktit që sipas tij, vendi është marrë me 720 milion euro borxh të fshehur. “U detyruam të thërrasim për ndihmë zjarrëfikësin FMN”, tha Rama, e cila siç përmemdi ai, u kishte kërkuar kushtin e rëndë të uljes së rrogave dhe pensioneve.
Rama tha se ndërsa vendet e tjera i janë bindur këtij kushti, qeveria e tij arriti që ta shmangë duke ndërmarrë operacionin e njohur të pagesës së energjisë, çka çoi sipas tij deri dhe në rritjen e rrogave për policët.
Gjithashtu, kryeministri shqiptar ka cituar edhe Reganin në dëm të tij, me thënien se “qeveria nuk është zgjidhja, por problemi”. Rama e ka pranuar vërtetësinë e kësaj thënieje edhe për qeverinë e tij, duke shtuar se ajo gjithsesi ka kurajon të vendosë gishtin mbi plagë mbi çdo gjë që nuk shkon, edhe në policinë e shtetit. /tesheshi.com/
