Vite pas të qënit në një komision hetimor parlamentar, kryeministri Rama u shfaq sërish në një të tillë, por pa megafon – siç ndodhi në vitin 2003, kur ndaj u formua një komision me në krye të ndjerin Sokol Olldashi, për t’u hetuar në lidhje me disa investime nga bashkia. Rama ishte kësaj radhe tek komisioni i hetimit për CEZ më statusin e dashmitarit mbi privatizimin e bujshëm, një ndër aferat më të përfolura.
I pyetur nëse Çekia ka kërcënuar me veto për marrjen e statusit të vendit kandidat të BE për Shqipërinë, shefi i ekzekutivit tha se ka pasur presione, për të cilat ka biseduar drejtpërdrejt edhe me homologun çek, për të cilat kishte njoftuar edhe vendet e tjera të BE-së.
Ndërsa në lidhje me marrëveshjen e qeverisë së tij me çekë, e cila çoi në shmangjen e arbitrazhit, Rama u shpreh se u bë më e mira për vendin, pasi qeveria e tij kishte trashëguar një pozicion të dobësuar dhe se zgjidhja miqësore ishte mundësia më e mirë.
“Kur ne morëm detyrën na imponohej një ndërhyrje e shpejtë për një situatë e cila ishte e komplikuar. Mos harrojmë që në tetor të vitit 2013 humbjet ishin rreth 50%, mos harrojmë që situata financiare ishte ajo që ishte dhe u detyruam të thërrasim ‘zjarrfikësit’ e FMN. Qoftë Banka Botërore, qoftë FMN, e kërkonin me plotë të drejtë dhe me këmbëngulje një zgjidhje të shpejtë. Të gjitha rrethanat dhe arsyetimet prevalonin zgjidhjen miqësore të konfliktit për shkak të së kaluarws ku qeveria shqiptare e kishte dobësuar pozicionin duke rrezikuar një kolaps energjetik dhe financiar”, deklaroi Rama.
CEZ është një çështja e cila ka zënë vend të madh në debatin politik. Të dyja palët akuzojnë njëra-tjetrën për afera, njëra për formën e privatizimit duke jua dhënë, dhe tjetra për formën e ndjekur në zgjidhjen e privatizimit. /tesheshi.com/
