Nga Kuvendi i Kosovës, në një seancë të përbashkët mes dy parlamenteve, kryeministri Rama deklaroi se sanksionet e BE-së ndaj Kosovës janë një absurditet.
Rama theksoi se në samitin e BE-së me Ballkanin Perëndimor ka këmbëngulur bashkë me presidenten e Kosovës, Vjosa Osmani që ato të hiqen.
“Dëshira ime e zjarrtë e patregueshme dot me fjalë është që të mos jemi njëri në tryezën e negociatave për anëtarësim në BE e tjetri në listën e sanksioneve të BE, të cilat meqë ra fjala sot janë një absurditet absolut. Së bashku me presidenten, në samitin me BE dy ditë më pare, kemi këmbëngulur me forcë që ato masa të hiqen dhe kemi siguruar që të gjitha fondet e BE-së që janë penguar të lëvrohen për shkak të atyre masave të mos digjen”, tha kreu i qeverisjes së Tiranës.
Duke vijuar kritikat për Brukselin, Rama këshilloi njëherësh dhe politikën e Prishtinës.
“Ne duhet të jemi dorë për dore paqedashës dhe paqeruajtës për të bindur dora dorës edhe skeptikët më të mëdhenj në BE për absurditetin e mosnjohjes së tyre ndaj shtetit të Kosovës dhe në sytë e tyre barra e fajit për degradimin e dialogut duhet t’i bjerë e gjitha vetëm Serbisë, por kurrsesi nuk duhet të lejojmë qoftë edhe një gram t’i bjerë Kosovës”, tha ai.
“Duam që Republika e Kosovës të njihet një orë e më parë nga vendet e BE që ngurrojnë të pranojnë realitetin e pandryshueshëm të pavarësisë përfshirë edhe nga vetë Serbia të cilën Kosova e ka mundur me luftë këtu e 25 vjet më parë dhe nuk ka më asnjë arsye për ta lidhur me të në asnjë formë dhe asnjë mënyrë fatin europian të saj”, nënvizoi kryeministri Rama. /tesheshi.com/
