Kryeministri Rama ishte në një tubim politik në Kavajë, aty ku kundërshtarët e tij demokratë kanë planifikuar një protestë më datë 7 maj, siç thonë, për të mos lejuar rivendosjen e monizmit, pasi siç dihet tashmë, PD ka vendosur bojkotin e zgjedhjeve. Në Kavajë organizohen zgjedhjet e pjesshme lokale, për të zgjedhur njeriun që do zëvëndësojë Elvis Roshin, të cilit iu hoq mandati nga Kushtetuesja. Rama u tha të rinjve që të votojnë për herë të parë, por dhe shumë përkrahësve të pranishëm në tubim se ata, njerëzit e çadrës duan që t’i zënë rrugën Kavajës.
“Sot duan të rikthen në Kavajë dhe nuk duan të rikthehen në një garë për t’u gjykuar me votë nga populli i Kavajës, por duan të rikthehen për të bllokuar rrugën e Kavajës drejt të ardhmes, për të ndaluar orën e Kavajës siç e ndaluan çerek shekulli; duan të rikthehen në Kavajë për konflikt, për të përplasur qytetarët duke i ndarë, përçarë dhe duke i futur në një konflit pa kuptim. Por nuk besoj se ka demokrat të ndershëm, qytetarë të zakonshëm që ka votuar dhe voton PD që është gati të përplaset me fqinjin vetëm e vetëm që ata që janë futur në çadër të shpëtojnë nga drejtësia. Nuk besoj se ka prindër demokratë që janë të gatshëm t’i shkojnë pas marrëzisë së Saliut, Lulit dhe atyre që janë ngujuar në çadër nga frika e drejtësisë për të shpëtuar gjykatësit dhe prokurorët e korruptuar që i kanë marrë frymën njerëzisë. Jam i bindur që demokratët, ata që janë me PD me zemër por dhe arsye, kurrë nuk do pranojnë të bëhen mish për topat e kësaj marrëzie që ushqehen nga frika e tmerrshme e drejtësisë që na duhet”, tha Rama.
Shefi i qeverisë, si dhe në disa aktivitete të ditëve të fundit, i mëshoi akuzave ndaj gjyqtarëve dhe prokurorëve, atyre që ai i konsideron të korruptuar, duke thënë se do u tregohet vendi.
Pos seriozitetit politik, Rama dha dhe një shoë me sjellje adoleshenti duke u ulur këmbëkryq në podum, ndërkohë që dhe veshjen e pati të stilit të viteve para se të bëhet kryetar i opozitës, me pantollona model brekushe dhe tutë sporti. /tesheshi.com/
