Kryeministri Rama komentoi shpërfillshëm protestën e opozitës të së shtunës, duke thënë se ishte partish e jo qytetarësh.
“Për çfarë proteste flisni?! Për cilët qytetarë flisni?! Për një protestë partish?! Një ‘non grata’ dhe një ‘spiun’ që mbledhin militantët e tyre?! Le ta bëjnë sa herë të duan. Kjo nuk ka lidhje me qytetarët e shqetësuar.
Kjo është një protestë partish për pushtet për të prishur e për të marrë, me të vetmin rezultat që hodhën ca bojë këtu që iu desh punëtorëve natën për ta larë. Kështu është ndarë kjo punë. Ata bëjnë pis, ne pastrojmë
Le ta bëjnë çdo ditë po të duan. Kjo është një çorbë që e kemi parë prej 30 vjetësh që e gatuan i njëjti kuzhinier ‘non grata’”, tha Rama para gazetarëve në një dalje për media.
Ai i mëshoi sërish faktit që sipas tij, opozita është financuar me para ruse për të rrëzuar qeverinë.
“Më vjen keq për ata që pavarësisht se janë militantë harrojnë që po shkojnë pas disave që paguhen nga të huajt për të bërë dëm në këtë vend”. /tesheshi.com/
