Kryeministri, Edi Rama priti në një takim Presidentin e Maqedonisë, Gjorge Ivanov, i cili ndodhet për një vizitë zyrtare në Tiranë, si dhe delegacionin që e shoqëronte. Forcimi i bashkëpunimit në kuadrin e projekteve të përbashkëta rajonale, të mbështetura nga BE, ishte fokusi i bisedimeve mes palëve.
Kryeministri Rama dhe Presidenti Ivanov folën për marrëdhëniet e mira që ekzistojnë mes vendeve dhe shprehën vullnetin e përbashkët për t’i konsoliduar ato në bazë të respektit e fqinjësisë së mirë, si dhe të së ardhmes së përbashkët europiane.
Të dy personalitetet ndanë të njëjtin angazhim që bashkëpunimi mes Shqipërisë dhe Maqedonisë të jetë më frytdhënës në të ardhmen, veçanërisht në fusha si infrastruktura, transporti, energjia, të cilat do t’i shërbejnë zhvillimit ekonomik të dy vendeve.
