Kryeministri Edi Rama ka ftuar opozitën në rrugën e bashkëpunimit, duke shtuar se do të vazhdojnë përpjekjet për krijimin e kushteve për dialog.
Në komunikimin javor, Rama tha se “në 25 qershor u zgjodhëm për të mirëqeverisur vendin dhe në këtë kuadër kemi zgjedhur rrugën e dialogut dhe bashkëpunimit me opozitën”.
Ndërsa e ka cilësuar atë si pa ide dhe vizion, Rama tha se nëse opozita do të vazhdojë në këtë rrugë, rrezikon të shkojë në një humbje tjetër dhe të dobësohen si parti.
“Propaganda e shfrenuar kundër zgjedhjeve e atyre që nuk dolën fitues, është thjesht një shfaqje kuptimplotë e zbrazëtisë së tyre programore. Nëse vijojnë kështu jo vetëm rrezikojnë të shkojnë në një humbje tjetër, por edhe të dobësohen si një parti politike. Kjo është një përpjekje e dëshpëruar dhe e padenjë për një opozitë që në mungesë të vizionit, rreket si e marrë për të mbjellë paqëndrushmëri e pasiguri. Por qeveria nuk e zgjedh opozitën. Ne jemi zgjedhur nga shqiptarët për të mirëqeverisur vendin dhe kemi zgjedhur rrugën e dialogut e bashkëpunimit me opozitën”, tha Rama.
Gjithashtu, kryeministri rikonfirmoi se një skuadër amerikane e specializuar kundër krimit, do të zbarkojë në Shqipëri për luftën ndaj grupeve kriminale, përfshi këtu edhe sekuestrimin e aseteve të vendosura nga veprimtari të paligjshme.
“Ka nisur beteja për të sekuestruar asetet kriminale të përfituara nga këto rrjete, do çojmë para drejtësisë të fortët, të mësuar prej shumë vitesh të lëvizin lirshëm. Kjo betejë ka nisur dhe në bashkëpunim me ndërkombëtarët dhe falë një skuadre anti-krim amerikane ne do ta vazhdojmë betejën ditë për ditë, këmba këmbës”, tha Rama. /tesheshi.com/
