Fshati është kthyer ne fokus të luftës politike mes mazhorancës dhe opozitës në Shqipëri. Gjatë një ndalese në Perondi të Kuçovës, kryeministri Edi Rama promovoi idenë e kreditimit, me kushtin që fermerët të legalizohen.
“20 përqind rimbursim të çdo prodhimi që shisni me letra. Është shifër shumë e lartë rimbursimi për shtetin, por ne duam që të formalizoheni. Të shisni me letra, të keni NIPT-in, sepse pastaj kjo është një bazë për të marrë më tutje financime. Nuk merr dot financime kur nuk ekziston në asnjë vend”, tha Rama.
Por për kreun e opozitës, nuk është kjo zgjidhja e duhur për fshatarin.
“Zgjidhja për fshatin, zgjidhja për fermat, zgjidhja për fermerët është subvencioni. Nuk ka zgjidhje tjetër, se përndryshe nuk e bënte Europa. Subvencionet në vitin tonë të parë do të jetë 100 milionë euro dhe nuk do të shkojnë tek grumbulluesit, do të shkojë drejtpërdrejtë tek fermeri, pa NIPT, pa burokraci. E vetmja gjë që do të matet do të jetë është prodhimi, kaq prodhim ke kaq subvencion meriton, do të marrësh subvencionin”, deklaroi Basha, i cili vijoi më tej duke thënë: “Është zgjidhje kredia pasi e ke rrënuar për 3 vjet fshatin? S’ke bërë asnjë investim, asnjë kilometër rrugë, asnjë metër rrugë nuk ke shtru. A ishte ky që thoshte : “Do të shtroj rrugët në çdo parcelë”. Ndërkohë që një metër rrugë rurale nuk e ka shtruar. A ishte ky që thoshte do të sjellë ujin, do të bëjë vaditjen, do të bëj kullimin, një vepër nuk ka fillu. Rama per 760 milione dollaret borxhe”, deklaroi nga Gruemira e Malësisë së Madhe kreu i PD-së.
por nga ana tjetër, Rama u tha fshatarëve kuçovarë se “investimi më i madh që ne do të bëjmë është që t’u japim juve titujt e pronësisë. Ky proces ka filluar dhe ne nuk i ndahemi. Është shumë i vështirë sepse është i mbushur me konflikte”, tha Rama.
Dhe kjo është beteja për ta bërë fshatin për vete pak muaj para zgjedhjeve. /tesheshi.com/
