Kryeministri Rama u tregua tejet i ashpër me Bullgarinë, vetoja e së cilës ndaj Shkupi ka bllokuar negociatat dhe me Tiranën.
Nga Brukseli, i ndodhur aty për samitin e radhë së BE-së me Ballkanin Perëndimor, Rama tha se ajo që po bën Sofja është një turp.
“Çfarë turpi për Europën kjo çështje bullgare. Në mes të një lufte në oborrin e pasmë të saj, një vend i NATO-s merr peng dy vende të tjera të NATO-s, nën vëzhgimin e 26 vendeve të BE-së, që po tregohen të pafuqishme”, shkroi ai.
I ballafquar me media bullgare atje, Rama gjeti rastin të shfryjë rëndë ndaj tyre.
Jeni rrëmujë ju djema. Një rrëmujë e madhe dhe jeni një turp, është mëkat që mbani peng dy vende të tjera të NATO-s.
Nuk pres lajme të mira sot, sepse siç e thashë dje, u ngrit paksa optimizmi, por ja ku jemi: një ditë e re në Europë, por jo në Bullgari”, u shpreh kreu i qeverisë shqiptare.
Teksa u pyet nëse ka frikë se Shqipëria do të jetë një viktimë, ai u përgjigj: “Ne s’do të jemi kurrë viktimë se e dimë që në këtë rrugë ka një Bullgari këtu dhe një Bullgari atje, por ne nuk ndryshojmë kursin tonë dhe do e ndërtojmë Europën në vendin tonë”. /tesheshi.com/
