Kryeministri Rama ka bërë një deklarim alla Berishës, kur ky i fundit qe në pushtet, teksa e thoshte se Shqipëria vjen pas Gjermanisë për rritje ekonomike.
“Paga e mjekëve specializantë në rrethe është më e larta se pagat e mjekëve në Gjermani”, ka deklaruar Rama gjatë prezantimit të portalit “Mjekë për Shqipërinë”, një tip dritareje për ata që përfundojnë studimet rishtaz për mjekët specializantë.
Në fakt nuk është hera e parë që kryeministri e bën këtë pohim. Por më speficikisht, ai ka sqaruar të tjerë herë se është fjala për atë lloj page që mjeku do merrte sapo të niste punë në Gjermani. Pra, sipas Ramës, nëse një mjek shkon tani në vendin e Merkelit e nis punë, nuk do merrte më shumë se sa po të niste shërbimin si specialist në rrethe.
Ndërsa sa i përket portalit. tha: “Ky portal i ri është një instrument në dorën e gjithë tyre që me të drejtë kanë pasur shqetësimin e mungesës së informacionit, e mungesës së kanaleve të dedikuara dhe transparente për të kërkuar që të marrin një punë duke u angazhuar në sistem dhe e mungesës së një pasqyre, që mund të shihet se si funksioni sistemi nga brenda”, tha shefi i qeverisë. /tesheshi.com/
