Kabineti qeveritar gjerman vendosi të martën për shpalljen e Shqipërisë, Kosovës dhe Malit të Zi si vende të sigurta origjine, duke shtuar listën e vendeve të tjera ballkanike që e kanë pasur më herët këtë status.
Si njofton DW, më pak se një javë pas samitit të Berlinit për refugjatët, kabineti qeveritar gjerman e mori këtë vendim në kuadrin e një pakete ligjore që parasheh ndryshime në politikën e azilit dhe të refugjatëve.
Vendimi i qeverisë gjermane shndërron në ligj marrëveshjen e arritur mes federatës dhe landeve, për shpalljen e Shqipërisë, Kosovës dhe Malit të Zi si vende të sigurta origjine, gjë që do të shkojë paralelisht me shkurtimin e asistencave për këto grupe refugjatësh.
“Për qeverinë gjermane refugjatët që vijnë nga Shqipëria, Kosova dhe Mali i Zi nuk janë të përndjekur politikisht. Por për miratimin e paketës së re ligjore qeveria e Unionit CDU/CSU dhe socialdemokratëve duhet të marrë edhe miratimin e Të Gjelbërve në Këshillin Federal. Dy nga landet e bashkëqeverisura me Të Gjelbrit duhet të thonë së paku Po. Sinjalet janë që kësaj here qeveria do të marrë miratimin e Këshillit Federal për shpalljen e Shqipërisë, Kosovës dhe Malit të Zi si vende të sigurta origjine”, thotë DW.
Paketa ligjore e kabinetit do të diskutohet së shpejti në Bundestag, ndërsa në fillim të tetorit do të vuloset në parlamentet e landeve. Ligjet e reja pritet që të hyjnë në fuqi më 1 nëntor.
“Nga viti 2016 federata do të paguajë për azilkërkuesit një shumë fikse prej 670 eurosh për secilin refugjat tek landet. Edhe ngritja e qendrave të reja për azilkërkuesit parashihet të lehtësohet nga pengesat burokratike. Federata këtu pritet të angazhohet me 500 milionë euro”, thotë DË.
“Në rast pagese me para në dorë, kërkohet paradhënia vetëm për një muaj. Nëse për disa grupe azilkërkuesish parashihen shkurtime të dukshme të asistencave, për azilkërkuesit me shanse pranimi të azilit do të synohet integrimi më i shpejtë përmes ndjekjes së kurseve të gjuhës”, sqaron DW. /tesheshi.com/
