Nga Blendi Gashi
Nga dita e çertifikimit të zgjedhjeve, koalicioni fitues PDK-AAK-NISMA po këmbëngulë se do të formojë qeverinë dhe se nuk do ketë ngërç të ri politik edhe pse kanë vetëm 39 vota të sigurta.
Përfaqësues të këtyre partive, sidomos të PDK-së së Kadri Veselit dhe AAK-së së Ramush Haradinaj, ky i fundit kandidat për kryeministër, në çdo paraqitje mediale bindshëm deklarojnë se “i kemi numrat”. Këtë gjë PDK-istët e thonin në vazhdimësi edhe në betejën për Demarkacionin me Malin e Zi por që në fund dështuan me apo padashje.
Një lojë e njëjtë ka filluar edhe tashmë për krijimin e qeverisë së re, ku rolin kryesor sërish e ka PDK-ja por me aleatë të ndryshëm, jo me LDK-në.
Të gjendur në një situatë tejet të pakëndshme, ku as sigurimi i 20 votave të minoriteteve s’i bëjnë punë, PAN-i patjetër duhet të sigurojë të paktën edhe dy vota për ta formuar ekzekutivin. Dhe për të arritur këtë tashmë po mundohen të “kontrabandojnë” deputetë, njëjtë siç ndodhi me zgjedhjen e Thaçit president, ku ca deputetë u shpërblyen me pozita ambasadorësh.
Së fundmi përveç deklarimit të Haradinajt se i posedojnë votat për formimin e ekzekutivit, një gjë të tillë e ka thënë Bekim Haxhiu i PDK-së.
Ky i fundit ka qenë tejet më konkret, pasi ka deklaruar se PAN ka siguruar së paku 63 vota, duke përfshirë 20 vota të minoriteteve dhe së paku katër nga subjektet tjera.
“Numrat i kemi. Do të shihet në Kuvend pas votimit për kryetar të Kuvendit. Do të shihet hapi për qeverinë. Ka deputetë që kanë reflektuar. Ka deputetë që para interesit individual apo grupor e kanë interesin shtetëror. E garantuar deri tani është se kemi 63 deputetë, nëse ky numër nuk rritet ditëve në vijim”, ka thënë Haxhiu së fundmi në një intervistë për mediat, por që nuk ka dhënë asnjë emër se kush nga deputetët qoftë të Vetëvendosje-s apo LDK-së e aleatëve të saj mund ta votojë qeverinë eventuale në krye me Haradinajn.
Ja si i shohin analistët deklaratat e PAN-it…
Këto deklarata të njerëzve të PAN-it analistët politikë i marrin jo serioze dhe të bëra për konsum të brendshëm politik sa për të shkaktuar hamendësim tek deputetët e rinj.
Seb Bytyqi, ligjëruesi i shkencave politike në Universitetin e Uinçesterit në Angli mendon se deklaratat e tilla nuk reflektojnë realitetin dhe dyshon se bëhen për ta përgatitur opinionin që ta pranojë zgjatjen e procedurave në rast se Vetëvendosje arrin marrëveshje me LDK-në dhe aleatët.
“Në atë rast PAN nëse vendosë ta pengojë atë koalicion do të vazhdojë të deklarojë se i ka numrat. Gjithashtu mund të jetë shantazhim i LDK-AKR-Alternativa-s duke aluduar në tradhtinë e disa deputetëve të saj. Pra është metodë e negocimit përmes mediave. Numrave do t’iu besojm♪ kur i shohim 61 nënshkrime të deputetëve”, thotë Bytyqi për tesheshi.com.
Ndërsa analisti politik Faik Krasniqi, mendon se deklaratat e PAN lidhur me numrat bëhen për konsum politik dhe për të krijuar mjegull dhe përçarje tek partitë dhe deputetët e partive tjera.
“Edhe në 2014 Adem Grabovci dilte çdo ditë me deklarata të tilla se i kemi numrat për qeverinë, por krijimi i ekzekutivit zgjati për rreth 6 muaj. Prandaj, nuk besoj që koalicioni PAN i ka votat për krijimin e qeverisë, përndryshe nuk do t’i bënin oferta partive tjera. Koalicioni PAN do të tentojë me çdo kusht formimin e qeverisë, qoftë edhe duke kontrabanduar deputetë të partive tjera. Një gjë të tillë veçse e kanë filluar nga PAN-i, por nuk besoj që do të kenë sukses, edhe pse nuk u besohet partive nga koalicioni LAA, që ndonjëra nga ato ti bëhen bisht ‘Klanit Pronto’ në qeverisje”, thotë Krasniqi për tesheshi.com. /tesheshi.com/
