Prishtinë – Qeveria e Kosovës ka ndarë të mërkurën 141.700 euro për mbulimin e shpenzimeve të punës së Sekretarisë së Komisionit Qeveritar për njohjen dhe Verifikimin e Statusit të Dëshmorit të Kombit, Invalidit, Veteranit, pjesëtarit apo të internuarit të Ushtrisë Çlirimtare të Kosovës për vitin 2015. Këto mjete ndahen nga shpenzimet e paparashikuara të rezervave të Qeverisë, dhe barten te Zyra e Kryeministrit.
Gjatë mbledhjes së rregullt të ekzekutivit, Kabineti Qeveritar ka marrë vendim gjithashtu që të ndahen 100.000 euro për kompensimin e dëmit të shkaktuar nga zjarri në Stadiumin “Riza Lushta” në Mitrovicë.
Në po këtë mbledhje, është emëruar Kreshnik Gashi Sekretari i Përgjithshëm në Ministrinë e Punëve të Jashtme, për një mandat trevjeçar.
Gjatë hapjes së mbledhjes, kryeministri i Kosovës, Isa Mustafa, ka kërkuar nga anëtarët e kabinetit qeveritar që me prioritet të lartë të trajtojnë dhe përgatisin përgjigjet në pyetësorin për Konferencën e Berlinit për Ballkanin Perëndimor, që sivjet do të mbahet në Vjenë./TeSheshi.com/