Kancelarja gjermane nderoi të dielën ushtarët sovjetikë të vrarë në Luftën e Dytë Botërore, dhe vendosi një kurorë në varrin e Ushtarit të Panjohur pranë mureve të Kremlinit, pasi shmangu një ditë më parë pjesëmarrjen në paradën e madhe në Moskë.
Ajo u pa hera-herës e buzëqeshur në komunikimin me Putinin, i cili e shoqëroi në veprimtaritë e saj, dhe dy udhëheqësit zhvilluan më pas bisedime, në një përpjekje për përmirësimin e marrëdhënieve që me nisjen e krizës ukrainase.
Merkel e hapi fjalën në fillim të bisedimeve duke thënë, “Eshtë e nevojshme për ne të punojmë, të bashkëpunojmë, … dhe të përpiqemi të gjejmë zgjidhje diplomatike.”
Shtetarja gjermane ka luajtur një rol ndërmjetësues muajt e fundit mes Perëndimit dhe Kremlinit, ndërsa Rusia është gjendur vijueshmërisht nën kritikat e ashpra për rolin e saj në konfliktin në Ukrainë.
Ndryshe nga dëshira e shfaqur për marrëdhënie më të ngrohta me Gjermaninë, Putini vazhdon të mbajë një qëndrim të ftohtë e sfidues ndaj SHBA-ve, që i akuzoi të shtunën për “krijimin e një bote njëpolare”.
Aneksimi i Krimesë në marsin e 2014-s dhe nxitja e pretenduar e konfliktit separatist në Ukrainë kanë sjellë shqetësim tek kancelaritë perëndimore, të cilat i kanë vënë sanksione Rusisë dhe kanë paralajmëruar për të tjera akoma.
Vendet ish-sovjetike të Balltikut e shohin Rusinë si një kërcënim për sigurinë e tyre kombëtare, e ndërkaq vendet e Europës Lindore i tremben kthimit të viteve të Luftës së Ftohtë. /tesheshi.com/
