Nëse NATO vendos infrastrukturën e saj në Finlandë dhe Suedi, pasi të dy vendet t’i bashkohen Aleancës së Atlantikut të Veriut të udhëhequr nga Shtetet e Bashkuara, Rusia do të përgjigjet me të njëjtën masë, tha sot Presidenti Putin.
Ai tha se nuk mund të përjashtohen tensionet e ardhshme në marrëdhëniet e Moskës me Helsinkin dhe Stokholmin për shkak të anëtarësimit në NATO.
Ai shpjegoi se Rusia “nuk ka të njëjtat probleme me Suedinë dhe Finlandën si me Ukrainën” dhe se nuk ka asgjë që mund ta shqetësojë Moskën në lidhje me anëtarësimin e këtyre dy vendeve skandinave në NATO.
“Thjesht duhet të themi qartë se nuk ka pasur asnjë kërcënim më parë, por në rast të vendosjes së kontigjentit ushtarak dhe infrastrukturës, ne do të duhet të përgjigjemi reciprokisht dhe të krijojmë të njëjtat kërcënime për territoret nga të cilat jemi të kërcënuar”, tha presidenti rus.
Teza “e rreme”.
Ai tha se teza “e rreme” se përpjekja e Rusisë për të larguar forcat e NATO-s nga kufijtë e saj duke penguar Kievin të anëtarësohej në Aleancë, çoi në të kundërtën.
“Për ne anëtarësimi i Finlandës dhe Suedisë në NATO nuk është i njëjtë me anëtarësimin e Ukrainës, janë gjëra krejtësisht të ndryshme. Ata e kuptojnë shumë mirë këtë. Kjo është një çështje krejtësisht tjetër”, tha Putin.
Komenti i presidentit rus erdhi një ditë pasi Turqia hoqi veton ndaj pranimit të Finlandës dhe Suedisë në NATO pas nënshkrimit të një marrëveshjeje në Madrid me dy vendet nordike për mbrojtjen e ndërsjellë të interesave. /tesheshi.com/
