Rusia dhe Perëndimi gjenden në pikën më të ulët të marrëdhënieve mes tyre që prej Luftës së Ftohtë, për shkak të aneksimit të Krimesë dhe të mbështetjes së separatistëve në lindje të Ukrainës. Në kuadrin e një përpjekjeje për çtensionimin e situatës, sot pritet që sekretari amerikan i Shtetit, John Kerry, të takojë presidentin rus, Vladimir Putin. Në takimin mes tyre, të planifikuar për t’u zhvilluar në Soçi të Rusisë, ata do të bisedojnë për një sërë çështjesh, ku vend të parë zë Ukraina, e më pas Siria e Irani.
Sipas Departamentit Amerikan të Shtetit, vizita synon të “mbajë të hapura rrugët e drejtpërdrejta të komunikimit me zyrtarët e lartë rusë dhe të garantojë përcjelljen qartë të pikëpamjeve amerikane.”
Dy palët do të diskutojnë mbi Sirinë, në mospajtim mes tyre për mënyrën e dhënies fund luftës civile atje dhe për fatin e mëtejshëm të Beshar Esadit.
Temë tjetër e bisedimeve do të jetë dhe programi bërthamor i Iranit, të cilit kërkohet t’i vihet fre me një marrëveshje më 30 qershor.
Ministria ruse e Punëve të Jashtme e njoftoi vizitën e Kerry-t, por bëri të ditur se ai do të takohej me homologun rus, Lavrov, pa e përmendur Putin-in.
Qëndrimi i SHBA-ve ndaj Rusisë ka qenë i ashpër në lidhje me konfliktin në Ukrainë, ndërsa Rusia i ka hedhur poshtë akuzat se po i mbështeste ushtarakisht separatistët. Amerikanët kanë lënë të hapur mundësinë e ndihmës me armatim të forcave qeveritare ukrainase, edhe pse kanë gjetur kundërshtinë e shteteve kryesore europiane. Mbi 6.100 persona kanë humbur jetën që nga prilli i 2014-s përgjatë krizës ukrainase.
SHBA-ja, Franca dhe Gjermania nuk morën pjesë me zyrtarët e tyre më të lartë në kremtimet të shtunën në Moskë të 70-vjetorit të fitores mbi nazistët, në shenjë kundërshtie ndaj influencës ruse në konfliktin në Ukrainë.
