Gjatë 7 muajve të 2017 (janar-korrik) buxheti i shtetit arkëtoi 248.3 miliardë lekë, ose 15 miliardë më shumë se një vit më parë.
Shifra u bë publike nga Ministria e Financave, sipas të cilës zërat me kontributin kryesor në rritjen e të ardhurave ishin Tatimi mbi Vlerën e Shtuar, taksat kombëtare dhe akcizat, të cilat së bashku i kanë sjellë buxhetit të shtetit gati 11 miliardë lekë më shumë se një vit më parë.
Por, rritja e të ardhurave është shoqëruar me një shtimin e shpenzimeve. Sipas Ministrisë së Financave, në 7 muajt e parë të vitit shpenzimet e buxhetit ishin 30 miliardë lekë më të larta se e njëjta periudhë e një viti më parë.
Rritja ka ardhur veçanërisht nga shpenzimet sociale, ku hyjnë pagesat e pensioneve, ato të sigurimeve shëndetësore dhe kompesimi i pronarëve, për shkak të hyrjes në fuqi të ligjit të ri të pronave.
Zëra të tjerë, ku shpenzimet kanë shënuar rritje, janë pushteti vendor dhe investimet publike.
Edhe pse shpenzimet janë rritur me një ritëm dy herë, bilanci i buxhetit ka vazhduar të jetë me suficit në masën 2.8 miliardë lekë. Megjithatë, deri në fund të vitit pritet që bilanci fiskal të mbyllet me deficit prej 31 miliardë lekësh. /tesheshi.com/
