Federata Ndërkombëtare e Futbollit (FIFA) ka konfirmuar se Botërori i këtij viti do të fillojë një ditë më herët se sa ishte planifikuar më parë, përkatësisht më 20 nëntor, me ndeshjen mes Katarit dhe Ekuadorit.
FIFA e ka shpjeguar këtë lëvizje me dëshirën për të ndarë hapjen ceremoniale dhe ndeshjen hapëse të kompeticionit si një ngjarje më vete.
Ndeshja Katar-Ekuador do të luhet të dielën e 20 nëntorit me fillim në orën 19:00 me orën lokale në vend të 21 nëntorit në të njëjtën kohë, ndërsa ndeshja Holandë-Senegal, e cila ishte menduar të luhej më 21 nëntor në orën 13:00, u zhvendos në orën 19.
Vazhdim i një tradite të kahmotshme
Ky ndryshim siguron edhe vazhdimin e traditës së kahmotshme sipas së cilës ndeshjen e parë në Botëror e luajnë ose vendasit ose kampionët në fuqi.
Dy ndeshjet e mbetura të planifikuara për 21 nëntor, Angli – Iran dhe SHBA – Uells, do të luhen në oraret e parapara, pra në ora 16:00 dhe 22:00 me orën lokale. /tesheshi.com/
