Partia Socialiste ka mbledhur sot grupin parlamentar në selinë e kryesisë së Kuvendit, pasi siç tha edhe kryeministri Edi Rama, salla e mbledhjeve në selinë e kësaj partie ishte e vogël për shkak të rezultatit të zgjedhjeve të 25 qershorit.
Por duket se socialistët kanë thyer traditën për mbledhjet e grupit, të cilat historikisht janë zhvilluar të hënën në mesditë, ndërsa sot është e martë. Nuk dihet nëse kjo shtyrje në ditë ka lidhje me vizitën e Ramës në SHBA, apo edhe në javët në vazhdim mbledhjet e grupit parlamentar do të zhvillohen sikundër sot.
Para nisjes së mbledhjes, kryeministri ka takuar në zyrë kreun e Kuvendit, Gramoz Ruçi si dhe ministrin e Brendshëm, Fatmir Xhafën, të dy të akuzuar dhe sulmuar fort nga opozita që në nisjen e legjislaturës së re të Kuvendit të Shqipërisë.
Mbledhja e grupit parlamentar ka konkluduar me firmosjen e marrëveshjes së mirëkuptimit mes deputetëve dhe ministrave. /tesheshi.com/
