Partia Socialiste ka ndërmarrë një proces verifikimi ndaj çdo kandidati të propozuar për zgjedhjet vendore të 21 Qershorit, ndërsa ka marrë me seriozitet çdo sinjal që është dhënë në lidhje me kandidatë me të kaluar kriminale
që garojnë në zgjedhjet vendore të 21 qershorit. Kështu u shpreh zv. Kryeministri Niko Peleshi pas mbledhjes së grupit parlamentar të PS, duke iu përgjigjur deklarimeve të Ambasadorit amerikan në Tiranë Donald Lu, sipas të cilit janë identifikuar kandidatë me histori kriminale dhe se ka nisur diskutimet me liderët politikë të tyre.
“Do marrim me seriozitet çdo lloj sinjali në këtë drejtim. Patjetër që ka një proces nga ana jonë për të verifikuar pastërtinë apo historinë e çdo kandidati. Ne e kemi treguar edhe në zgjedhjet e kaluara që kemi një shqetësim të veçantë për të patur kandidatë me integritet të lartë”, tha Peleshi.
Zv.Kryeministri ka shmangur komentet në lidhje me shqetësimet e ngritura së fundmi nga deputeti socialist Ben Blushi përmes një letre të hapur.
