Qeveria libaneze duhet të përmbushë kërkesat e protestuesve brenda 72 orëve, përndryshe do të përballet me protesta më të fuqishme këtë të martë. Kërkesat përfshijnë dorëheqjen e ministrit të Mjedisit, si dhe një zgjidhje të përhershme të krizës së plehrave, e cila i nxori fillimisht manifestuesit në rrugë.
Mes kërkesave të tjera janë vënia para përgjegjësisë e shpërdoruesve të fondeve publike, e po ashtu e ministrit të Punëve të Brendshme dhe e atyre që dhanë urdhër për të hapur më herët zjarr mbi protestuesit.
Duke iu drejtuar protestuesve në Sheshin e Martirëve, një prej drejtuesve të lëvizjes “Mbani erë të keqe” paralajmëroi, “Ne jemi ende në fillim”.
Dështimi i qeverisë libaneze për ta zgjidhur krizën e plehrave ka sjellë protesta masive prej ditësh në Bejrut, të organizuara nga lëvizja “Mbani erë të keqe”. Protestuesit e zemëruar me qeverinë kanë lëshuar thirrjet “revolucion, revolucion,” të vendosur për ta çuar deri në fund kauzën e tyre.
Protesta e tanishme është një shembull i rrallë i ngritjes në këmbë të libanezëve pa mbështetjen e një partie politike, edhe pse Hezbullahu është deklaruar në krah të tyre. Këtë e shprehu dhe një prej figurave kryesore të lëvizjes, “Kjo nuk është një protestë për partitë politike. Eshtë për të gjithë popullin libanez. Ne jemi kundër partive që po i shfrytëzojnë qytetarët.”
Situata në Bejrut ka qenë e tensionuar që në korrik, kur u shfaqën malet e plehrave në rrugët e tij. /tesheshi.com/
