Ka mbërritur reagimi i parë dhe mjaft i ashpër amerikan, mbi protestat e dhunshme me “flamurin” e të ndjerit Klodian Rasha, qëlluar nga një efektiv policor, që siç tha në dhënien e masës së arrestit, do donte t’i kërkonte falje familjes së të ndjerit par atë që kish bërë – marrjen e jetës së të riut.
“Vdekja e Klodian Rashas është një tragjedi dhe ne i shprehim ngushëllimet më të thella familjes dhe miqve të tij.
Ambasadorja Kim bisedoi sot me Kryeministrin Rama, Drejtorin e Policisë Veliu, Kryetarin e Partisë Demokratike Basha dhe Kryetaren e Lëvizjes Socialiste për Integrim Kryemadhi, për të diskutuar mbi të drejtat e qytetarëve dhe përgjegjësitë e udhëheqësve”, nis një deklaratë e ambasadës amerikane në Tiranë.
Më tej, bëhet e qartë se pas protestave të dhunshme, Uashingtoni sheh lidershipin opozitar, duke i theksuar si “ata që kanë qenë në pushtet më parë”.
“Ata që janë në pushtet kanë përgjegjësinë të sigurojnë një hetim të plotë dhe transparent të incidentit, të ushtrojnë përmbajtje në mbrojtjen e sigurisë dhe pronës publike, si dhe të sigurojnë përgjegjësi në të gjitha rastet. Në këtë drejtim, ne vërejmë se autoritetet kanë kapur oficerin në fjalë dhe kanë nisur hetimet. Ata që kërkojnë të jenë në pushtet duhet të shfaqin aftësinë e tyre për të udhëhequr në një mënyrë të përgjegjshme, përfshirë edhe duke refuzuar dhunën.
Ata që kanë qenë në pushtet më parë nuk duhet të bëjnë gabimet e së kaluarës, duke sugjeruar se dhuna është e pranueshme”, thuhet në deklaratë. /tesheshi.com/
