Rrugët e kryeqytetit të Venezuelës janë mbushur dje nga mijëra njerëz që protestonin në kahje të kundërta, kundër presidentit Nicolas Maduro dhe në mbështetje të tij.
Opozitarët u mblodhën në “nënën e të gjitha marshimeve” në Karakas e në qytete të tjera të vendit, duke e akuzuar presidentin për zhytje në kaos të ekonomisë e për shtënie të vendit në krizë politike.
Një tjetër protestë pati nga mbështetësit e Maduro-s, që manifestuan me nxitjen e tij.
Ndërsa forcat e sigurisë ndërhynë me gaz lotsjellës për ta zmbrapsur protestën e opozitarëve të qeverisë, është raportuar për dy studentë të vrarë.
Një 18-vjeçar u qëllua në kokë dhe nuk mundi t’u mbijetonte plagëve, duke ndërruar jetë në spital. Një studente u qëllua për vdekje nga njerëz të armatosur me motorçikleta që silleshin rreth protestuesve.
Në tetë ka shkuar numri i të vrarëve në protestat e këtij muaji në Venezulë. Mbi 400 persona u arrestuan gjatë ditës së djeshme, ndërkohë që protesta të tjera janë thirrur për ditën e sotme.
Kërkesa kryesore e opozitës është ajo për zgjedhje të parakohshme. /tesheshi.com/
