Edhe kryeparlamentari i Shqipërisë, Gramoz Ruçi ka dale kundër idesë së Thaçit që kosovarët të pajisen me pasaporta shqiptare, duke thënë se është më mirë që Kosova të përqendrohet në kriteret e përcaktuara ku bën pjesë edhe ratifikimi i Demarkacionit të kufirit me Malin e Zi.
Sipas tij nuk ka nevojë që çështja e vizave të zgjidhet “përmes relacioneve shqiptaro-shqiptare”, por në relacionet e Kosovës me Bashkimin Evropian.
“Unë e kam ndjekur atë që presidenti Thaçi kërkoi nga presidenti Ilir Meta. Unë e kam një përgjigje dhe ajo është se, ne jemi dhe mbështesim një zgjidhje të Bashkimit Evropian për çështjen e vizave për qytetarët e Kosovës. BE-ja nuk duhet ta lë Kosovën si një ishull të izoluar në Ballkan. Andaj, unë inkurajoj të gjitha forcat politike që çështja e Demarkacionit të zgjidhet, nëse kjo është pengesa, edhe pse mendoj se Kosova i ka përmbushur kërkesat evropiane”, ka deklaruar Ruçi. /tesheshi.com/
