Prona të ish-firmave piramidale me vlerë rreth 2 milionë dollarë do të nxirren në ankand nga Ministria e Financave.
Bëhet fjalë për 14 prona të firmave Vefa, Kamberi dhe Beno. Ankandi do të zhvillohet më 13 shtator të këtij viti nga Drejtoria e Drejtimit të Pronës Publike pranë Ministrisë së Financave.
Nga këto 9 objekte i përkasin firmës Vefa. Në to përfshihen 4 objekte te “Ish Sektori i Përpunimit te drurit” në Elbasan, tokë truall e “Ish Fabrikës së Salcës” në Fier, “Frigoriferi” në Rrëshen, “Ish Fabrika e Sallamit dhe Magazine Prodhimi” në Përmet, si edhe “Truall Depo Uji Nr. 1” dhe “Truall Stacion Pompimi” në Paskuqan.
Ankandi do vazhdojë me pronat e firmës Kamberi, ku më të rëndësishmet janë “Ish Pularia” në Patos dhe një Linjë Prodhimi Sallami në Nartë të Vlorës, raporton “scan”.
Një pronë që i përket firmës Beno, është një punishte sallami në Lushnje me vlerë rreth 80 mijë dollarë.
Prona më e shtrenjtë mes 14 objekteve i përket firmës Kamberi. Ajo është ish pularia e Patosit, me vlerë rreth 100 mijë dollarë.
Pasuritë në fjalë, janë të paktat që kanë mbetur pas konfiskimit të pronave të ish-firmave piramidale dhe ndarjes së një pjese prej tyre.
Skemat piramidale në Shqipëri filluan aktivitetin e tyre 93-94, duke sjellë si pasojë vitin tragjik, 1997, me falimentimin e rreth 25 firmave të cilat grumbulluan rreth 1.2 miliardë dollarë kursime të shqiptarëve./tesheshi.com/
