Nga Bashkim Kastrati
Gati 2 vjet më parë, shumë imamë të Kosovës u arrestuan nën dyshimin se kanë ndikuar në dërgimin e shqiptarëve të Kosovës në luftën e Sirisë.
Ndaj tyre u propozuan akuza të rënda, por në fakt shumë prej tyre pas disa javëve, këta persona aq të “rrezikshëm” pra, çuditërisht u liruan nga paraburgimi për shkak se nuk kishte bazë ligjore të mbaheshin pas hekurave.
Me këtë aksion, institucionet u krekosën se po e luftojnë terrorizmin dhe “ekstremizmin islam” dhe deklaruan se po kanë sukses në këtë betejë. Vala e arrestimeve u shoqërua me një shoë medial të paparë.
Këta imamë mbetën nën presion të vazhdueshëm për faktin se ndaj tyre nuk kishin pushuar hetimet dhe ata etiketoheshin shpesh në disa media si persona që kanë nxitur ekstremizmin në Kosovë nëpërmjet urrejtjes fetare, duke u bazuar vetëm në dyshime dhe hamendësime.
Ndër personat që ishin në thumb të mediave, dallonte ish-imami i xhamisë së madhe të Prishtinës, Shefqet Krasniqi. Në shumë raportime ai u paraqit vazhdimisht si i dyshuar për veprat e lartcekura, por e vërteta më në fund doli.
Prokuroria Speciale e Republikës së Kosovës, sot përmes një komunikate për media ka konfirmuar se nuk ka gjetur fakte për të ngritur aktakuzë ndaj Shefqet Krasniqit dhe të tjerëve të përfshirë në këtë rast.
“Ndaj të pandehurve të tjerë të përfshirë në këtë çështje penale, në mungesë të provave është marrë aktvendim për pushimin e hetimeve”, thuhet në njoftimin e Prokurorisë Speciale.
Por Prokuroria Speciale e Kosovës, ka ngritur aktakuzë pranë Gjykatës Themelore në Prishtinë kundër pesë të pandehurve: B. R., ish-imam në xhaminë afër Termokosit në Prishtinë; I. B., hoxhë nga Prizreni; E. G., kryeimam nga Peja; M. M., imam nga Prizreni dhe të pandehurit F. R.
Sa për të parët, ata janë Bedri Robaj dhe Idriz Bilibani, që sipas Prokurorisë me veprimet e tyre kanë kryer veprën penale: Shtytja për kryerjen e veprave terroriste, nga neni 141 i Kodit Penal të Republikës së Kosovës.
Ndërsa për të pandehurit: Enes Goga, kryeimam në Pejë dhe Mazllam Mazllami imam nga Prizreni, Prokuroria thotë se kanë kryer veprën penale: Nxitja e urrejtjes, përçarjes ose mosdurimit, kombëtar, racor, fetar apo etnik, nga neni 147 par. 2 lidhur me par.1 i Kodit Penal të Republikës së Kosovës; ndërkaq, të pandehurin Fuad Ramiqi aktakuza e ngarkon me kryerjen e veprës penale: Thirrje për rezistencë, nga neni 411 par. 1 i Kodit Penal të Republikës së Kosovës.
“Sipas aktakuzës, të pandehurit B. R. dhe I. B. me veprimet e tyre kanë kryer veprën penale: Shtytja për kryerjen e veprave terroriste, nga neni 141 i Kodit Penal të Republikës së Kosovës. Të pandehurit E. G. dhe M. M. poashtu sipas aktakuzës kanë kryer veprën penale: Nxitja e urrejtjes, përçarjes ose mosdurimit, kombëtar, racor, fetar apo etnik, nga neni 147 par. 2 lidhur me par.1 i Kodit Penal të Republikës së Kosovës, ndërkaq të pandehurin F. R. aktakuza e ngarkon me kryerjen e veprës penale: Thirrje për rezistencë, nga neni 411 par. 1 i Kodit Penal të Republikës së Kosovës”, thuhet në komunikatën e prokurorisë.
Sipas kësaj komunikate, aktakuza është ngritur nga një prokuror vendës i Prokurorisë Speciale të Republikës së Kosovës, i cili i ka propozuar Gjykatës që pas administrimit të provave dhe përfundimit të shqyrtimit gjyqësor, të pandehurit, për veprat penale që akuzohen, t’i shpallë fajtorë dhe t’i gjykojë sipas ligjit. /tesheshi.com/
