Prokuroria ka dhënë të mërkurën pretencën për dy deputetët Pjerin Ndreu dhe Arben Ndoka, të cilët akuzohen për goditje për shkak të detyrës, në incidentin me deputetin demokrat Gent Strazimiri, i ndodhur në ambientet e Kuvendit të Shqipërisë, vitin e kaluar.
Prokuroria kërkoi 1 vit burg për Arben Ndokën dhe 8 muaj për Pjerin Ndreun. Gjithsesi, dënimi i dy deputetëve mund të konvertohet në punë të detyrueshme në komunitet: 150 orë punë për deputetin Arben Ndoka dhe 80 orë punë për Pjerin Ndreun.
Prokuroria e Përgjithshme, në përfundim të gjykimit, ka argumentuar se deputeti Strazimiri është goditur për shkak të detyrës nga dy kolegët e tij, Ndoka dhe Ndreu, si pasojë e deklarimeve gjatë fjalës së mbajtur në seancën plenare të datës 10.07.2014, ku, ndër të tjera, ka përmendur faktin se në Parlamentin e Shqipërisë ka persona me rekorde kriminale, por pa përmendur nominalisht se për cilët bëhej fjalë. Menjëherë pas fjalës së tij, deputeti Strazimiri ka dalë nga salla plenare në korridorin e brendshëm, ku fillimisht është goditur me grushte dy herë në fytyrë nga deputeti Arben Ndoka. Pak çaste më vonë, ai është goditur me shpullë në pjesën e pasme të kokës edhe nga deputeti Pjerin Ndreu.
