Mundimi i Rusisë për ta vënë me shpatulla pas muri Turqinë në OKB duket të ketë shkuar kot, ndërsa projektrezoluta e saj nuk u prit mirë nga vendet pjesëmarrëse të Këshillit të Sigurimit.
Kjo projektrezolutë, e paraqitur në takimin e Këshillit të Sigurimit të premten, nuk e përmend Turqinë, por kërkon “ndërprerjen e çdo aksioni që minon sovranitetin e Sirisë.” Takimi i Këshillit të Sigurimit u thirr me kërkesë të Rusisë për të diskutuar projektrezolutën, e cila i dënon bombardimet e vazhdueshme përgjatë kufirit sirian.
E këtu kuptohet se bëhet fjalë për Turqinë, forcat ushtarake të së cilës po i bombardojnë prej ditësh pozicionet e kurdëve të PYD-së në veri të Sirisë në kundërpërgjigje të goditjeve me artileri në drejtim të Turqisë nga këta të fundit.
Ambasadori i Francës në OKB, Francois Delattre, u përgjigj kësisoj kur u pyet nëse e mbështeste projektrezolutën: “Përgjigjja e shkurtër është jo!”
Ai e përshkroi situatën e përshkallëzuar së fundi si, “rezultat të drejtpërdrejtë të ofensivës brutale në veri të Sirisë të udhëhequr nga regjimi sirian dhe aleatët e tij”.
“Tërheqje vëmendjeje” e quajti nismën ruse ambasadorja e SHBA-ve në OKB, Samantha Power, duke i këshilluar rusët që, në vend të kësaj, të zbatojnë një rezolutë të miratuar njëzëri në dhjetor që mbështet një plan paqeje për Sirinë. /tesheshi.com/
