Lojtari 25-vjeçar egjiptian është njeriu i momentit te Liverpuli. Dy gola në ndeshjen e fundit ndaj Totenhemit, i dyti në listën e golashënuesve të Premier Ligës, për të mos harruar kontributin e tij thelbësor në kualifikimin e Egjiptit për në Kupën e Botës të këtij viti.
BBC-ja i kushton sot këtij futbollisti një artikull të plotë përmes penës së shkruesit të saj kryesor për futbollin, Phil McNulty.
Mohamed Salah ka patur një ndikim mbresëlënës që me mbërritjen e tij në “Anfield”, nënvizon autori, dhe është bërë lojtari që më shpejt se çdokush tjetër i ka shënuar 20 gola në kampionatin anglez për Liverpulin, në vetëm 25 ndeshje.
Në vëmendje sillet statusi i Salah-ut si një hero në Egjipt falë golave të tij që e rikthyen përfaqësuesen në Botëror për herë të parë që nga 1990-ta.
Shkëlqimi, modestia dhe vendosmëria për të mos i harruar rrënjët e tij e kanë bërë atë një figurë ikonike dhe një burim të krenarisë kombëtare në Egjipt.
“Ai është një njeri dhe futbollist me këmbë në tokë, i pazhurmë,” theksohet t’i ketë thënë BBC-së një specialist egjiptian i futbollit, Marwan Saeed.
Salah ka luajtur fillimisht për Bazelin pasi la Egjiptin në vitin 2012. “Mohamed është tepër i përulur dhe modest. Ai është me këmbë në tokë dhe miqësor jashtë fushës. Por në fushë është një udhëheqës, i mençur dhe agresiv, në një pikëpamje pozitive,” thotë Murat Yakin, trajneri i tij asokohe.
Për të, Salah është tani “në një mënyrë shumë të thjeshtë dhe efektive një prej futbollistëve më prodhimtarë në botë”.
Pas Bazelit, Mohamed Salah do të luante për Çelsin, Fiorentinën dhe Romën. Te londinezët e Çelsit ai do të kalonte posaçërisht një kohë të vështirë, aq sa, siç thotë artikulli i BBC-së, do të etiketohej si dështim.
“Gjithçka ishte për të mbase shumë herët te Çelsi, shumë shpejt dhe shumë e madhe,” ka mendimin Yakin. “Ai i kishte cilësitë kur vajti në Itali, por po rritej me shkollën italiane, taktikisht dhe si njeri.”
Pas Serisë A do t’i vinte radha sërish Premier Ligës, ku Mohamed Salah do të shpërthente këtë sezon. Paraqitjet me Liverpulin kanë paralajmëruar një interesim të Realit të Madridit në verë, sipas presidentit të Federatës Egjiptiane të Futbollit, Hany Abo Rida, por qëndrimi modest i lojtarit nuk lë vend për shqetësim të atypëratyshëm, thotë artikulli i BBC-së.
“Eshtë e pashmangshme që paraqitjet e tij do të ngjallin interes; interes që mund të shtohet nëse ai luan mirë për Egjiptin gjatë Botërorit të kësaj vere,” citohet të ketë thënë Murat Yakin. Ama, ka shtuar ai, Salah “është i fortë mendërisht dhe i përqendruar te futbolli. Ai nuk është i interesuar për asgjë tjetër.”
Largimi i Coutinho-s për te Barcelona nuk ka sjellë aq shumë dëshpërim te tifozët e Liverpulit, por nëse klubi mendon ta shesë lojtarin e momentit, egjiptianin Salah, kjo do të ishte një humbje e vërtetë, thotë artikulli i BBC-së në rreshtat e fundit. Shpresohet që kjo të mos ngjasë!
Mohamed Salah u ka rrëmbyer zemrat në pak muaj mbështetësve të flaktë të Liverpulit, edhe pse nuk pati shumë fanfarë në mbërritjen e tij në nisje të verës së 2017-s.
Përgatiti: Bujar M. Hoxha – /tesheshi.com/
