Fitorja e Sadiq Khan-it në garën për kryetar të bashkisë së Londrës, nuk po rresht së analizuari nga e gjithë mediat botërore.
Juristi laburist është heroi i ditës dhe aktualisht njeriu më i famshëm i tokës. Është lajmi vetë. Kjo, jo vetëm për faktin që është kryebashkiaku i parë mysliman në Europën Perëndimore, por për faktin se ai fitoi garën përballë një milioneri, bir i një miliarderi; ndërkohë Sadiq Khan arriti majat e politikës duke qenë njëri nga 8 fëmijët e një shoferi autobuzi urban në kryeqytetin britanik.
Por kush është Sadiq Khan, njeriu që mediat londineze thonë që ka gjasa të jetë kryeministri i ardhshëm i Britanisë së Madhe?
Gjyshi i tij iku nga India, pas tmerrit të luftës civile dhe persekutimit të myslimanëve nga mazhoranca hindu. Ai ishte një nga milionat e themeluesve të shtetit të Pakistanit.
Babai i tij u largua nga Pakistani dhe u vendos në Londër për një jetë më të mirë, ku rriti plot tetë fëmijë.
Historia e Sadiq Khan, 45-vjeçar, tashmë qytetari numër një i Londrës duket se është pjesë e një romani klasik të viteve ‘800, kur një djalosh i varfër ngjitet në majë në një botë të re, outsider-i që triumfon kundër të gjitha parashikimeve.
Ai mund të bëhet fotografia e Anglisë, madje edhe të Europës së shekullit të 21: shenja që globalizmi, emigracioni dhe demokracia prodhojnë progres.
Integrimi dha një provë se mund të prodhohen histori njerëzore si ajo e Sadiq-ut.
“Dua të jem kryebashkiaku i të gjithëve”, ka përsëritur gjatë gjithë fushatës elektorale.
“Ndjehem mysliman, britanik, laburist, bashkëshort, baba dhe tifoz i Liverpulit”, është formula që prezantohet.
“Janm pro biznesit dhe pro Bashkimit Europian”, ka thënë në një intervistë pak kohë më parë”, në la Repubblica, ku nënvizoi që duhet të kesh këto ide që të drejtosh një metropol si Londra.
Ka qenë një udhëtim i gjatë ai që e ka sjellë në City Hall, bashkia londineze në këmbët e lumit Tamiz, përballë Kullës Bridge.
Gjyshërit e tij lanë Indinë në vitin 1947 pas ndarjes së Indisë, pasojë që solli pavarësia nga Britania e Madhe, proces që ndodhi me dhunë e urrejtje ndërfetare. Ata preferuan të jetojnë në Pakistan në mes të myslimanëve. Babai i tij i ndjerë, Amanullah Khan, emigroi në Londër, dy vjet pasi lindi Sadiq Aman (ky është emir i tij komplet, por Khan është një idiomë indiane) në vitin 1970.
Familja e tij(prindërit dhe 8 fëmijët, ndër të cilët 7 djem dhe një vajzë), banoi për vite në Earlsfield, periferia e kryeqytetit britanik, në një shtëpi të dhënë me qera nga bashkia, të ashtuquajturat shtëpi popullore që u jepeshin të varfërve.
Babai ishte shofer autobuzi, mamaja rrobaqepëse. “Jam rritur duke parë familjet time duke punuar vazhdimisht dhe kam ndjekur shembullin e tyre. Që i vogël bëja çdo lloj pune që gjeja. Shpërndaja gazeta, laja makinat e komshinjve, verës i jepja një dorë në një kantier ndërtimi.”
Familja Khan i dërgonte rregullisht para pjesës tjetër të familjes në Pakistan. “Sepse ishim më mirë se ata”, kujton ai.
Ka studiuar shkollat shtetërore falas, normalisht jo kolegjet provate të shtrenjta të cilat kanë frekuentuar David Cameron, Boris Johnson dhe Zac Goldsmith, rivali i tij në sfidën për t;u bërë kryebashkiaku i Londrës. Në fillim mendoi të regjistrohet në fakultetin e Mjeksisë për t’u bërë dentist, por më pas,një mësues e këshilloi të regjistrohet në Juridik, ngaqë admironte kapacitetin e tij për të argumentuar, por edhe i influencuar nga seriali amerikan “L.A. Law” (Avokatët në Los Angeles). Të lartën e kreu në shkollën e lartë shtetërore University of North London. Pasi mori diplomën dhe titullin “solicitor” (quhet në Angli avokati që nuk mbron në gjykatë), u specializua për të drejtat njerëzore. Ka fituar çështje kundër dhunës së policisë, diskriminimit në punë, por edhe të drejtat e të burgosurve.
Në ndërkohë ka lindur interesi i tij për politikë, në fillim kur u zgjodh si këshilltar bashkiak në një nga zonat periferike të Londrës, e më pas kandidoi në Parlament, ku qëndroi për dy legjislatura, duke nisur nga viti 2005, në radhët e Partisë Laburiste.
Konsiderohet një socialdemokrat i moderuar dhe ka qenë pjesë e qeverisë së Gordown Brown si zv/ministër i Transporteve.
Ka raporte jo të mira me liderin aktual laburist, Jeremy Corbyn, pasi janë të ndarë në këndvështrime: Sadiq është më në qendër, ndërsa Corbyn ndodhet majtas.
Gjatë fushatës së zgjedhjeve të Londrës, nuk e lejoi kryetarin e tij që të dalin në fushatë së bashku.
Në Londër premton të luftojë kundër hendekut të madh ndërmjet të pasurve dhe të varfërve, për ndërtimin e më shumë shtëpiave për klasën e mesme por edhe shtimin e sigurisë.
Është martuar me Saadiya Ahmed, avokate, edhe ajo me origjinë nga Pakistani. Kanë dy vajza, 17 dhe 15 vjeç.
Kjo është historia e Sadiq Khan, kryebashkiaku i parë mysliman për qytetin më të madh të Europës.
Një histori e gjatë por që sapo ka filluar dhe kushedi ku do të çojë. Integrimi tashmë është receta më e mirë ndaj dhunës dhe urrejtjes.
Përgatiti: Ylli Pata- /tesheshi.com/
