Tërheqja e SHBA nga Siria dhe ndërhyrja ushtarake turke po e detyron Evropën të rishikojë strategjinë e saj, duke rritur mundësinë që mercenarët e ISIS-it të kthehen në shtëpi.
Por Britania dhe Belgjika kanë përsëritur qëndrimet për të lënë shtetasit e tyre që të përballen me drejtësinë në vendet ku kanë kryer krimet, e jo të kthehen në shtëpi t’u përballur me gjyqin.
Zyra e Brendshme e Britanisë dhe Ministria e Jashtme e Belgjikës reaguan menjëherë pasi Turqia kërcënoi të deportojë luftëtarët e ISIS në vendet e tyre, pasi i ka kapur ata në operacionin ushtarak në kufirin verior me Sirinë.
Ministri i Brendshëm turk Sulejman Soylu paralajmëroi se vendi i tij nuk ishte “hotel për anëtarët e ISIS” dhe akuzoi Evropën se po i linte autoritetet turke të merreshin vetë me të burgosurit.
Vendet perëndimore janë munduar të gjejnë “mënyrën e duhur” të trajtimit të militantëve të dyshuar dhe familjeve të tyre që kërkojnë të kthehen nga zonat luftarake në Irak dhe Siri.
Politika e shumë vendeve evropiane deri më tani, veçanërisht Francës dhe Britanisë, ka qenë refuzimi i kthimit të luftëtarëve me gratë dhe fëmijët e tyre.
Refuzimi për t’i kthyer ata në Evropë mund të burojë nga shqetësimet që lidhen me paaftësinë e vendeve për të parandaluar dëmin e shkaktuar. Ekspertët thonë që shumë nga provat kundër tyre nuk mund të paraqiten në gjykatë.
Në një njoftim të botuar në faqen e saj të internetit, Zyra e Brendshme Britanike tha se kishte një “gamë të aftësive në dispozicion” për të parandaluar kthimin e individëve që thuhet se paraqesin rrezik të sigurisë kombëtare për Mbretërinë e Bashkuar – përfshirë tërheqjen e pasaportave britanike për ata që mbajnë shtetësi të dyfishtë ose urdhra për përjashtim të përkohshëm.
Ndërsa Ministria e Jashtme belge thotë për Euronews se qëndrimi i vendit për shtetasit e infiltruar në ISIS ishte që ata të gjykohen aty ky ndodhën krimet.
“Kjo domosdoshmërish duhet të bëhet në kushte të drejta dhe në përputhje me të drejtën ndërkombëtare. Diskutimet po vazhdojnë dhe Belgjika mbetet e bindur se kjo është zgjidhja që minimizon rreziqet për shoqërinë tonë, ndërsa respekton të drejtat e të pandehurit”, tha një zëdhënës i ministrisë.
Fuqitë evropiane kanë filluar bisedimet me zyrtarët irakianë për të mundësuar që të infiltruarit të mbahen në Siri e Irak për t’u përballur me gjyq – por përparimi ishte shumë i ngadaltë. /tesheshi.com/
