Në qytetin e Prizrenit është hapur panairi me disa nga veshjet tradicionale kombëtare të trojeve shqiptare dhe artizanateve, me pjesëmrrës nga Kosova, Shqipëria, Mali i Zi e të tjerë.
Panairi në ambient të hapur, në sheshin që lidhet me Kompleksin e Lidhjes së Prizrenit, ku ekspozohen edhe disa nga ushqimet tradicionale, mbahet nën patronatin e Drejtorisë Komunale për Turizëm dhe Zhvillim Ekonomik.
Kryetari i Komunës, Ramadan Muja, në ceremoninë e hapjes, vlerësoi rëndësinë e ruajtjes së trashëgimisë tradicionale të veshjeve dhe artizanateve.
Ndërsa, Stefan Çipa, kryetari i Bashkisë së Sarandës, është shprehur se kjo ngjarje përveç që bashkon vlerat tradicionale mbarëshqiptare, mundëson edhe shkëmbimin e përvojave në zhvillimin e turizmit dhe ruajtjen dhe kultivimin e trashëgimisë sonë të pasur kulturore.
Në panair po marrin pjesë përfaqësues të Malësisë së Madhe, të cilët kanë ekspozuar edhe veshjen e tyre karakteristike të xhubletës së vjetër 2000-vjeçare. Drejtori i Turizmit në Prizren, Mensur Bytyçi, i cituar nga media, tha se për shkak të rrethanave të fundit politike nuk po marrin pjesë edhe përfaqësues të turizmit të Maqedonisë.
Pjesëmarrës në këtë aktivitet, që pritet të ndikojë edhe në zhvillimin e turizmit, janë edhe përfaqësues nga Ulqini e Shkodra.
E cituar nga Zëri, Ergyle Gjurgjealo, që në tendën e saj ka ekspozuar veshje tradicionale shqiptare si dhe plisin e bardhë, ka thënë se një organizim i tillë është mundësi e mirë për promovimin e artizanateve të vjetra me të cilat dallohet Prizreni, si një nga qendrat e njohura jo vetëm në shqiptari, por edhe në rajon.
Në kuadër të panairit, në pjesën tjetër të qytetit në Kejin e Lumbardhit janë vendosur stenda edhe për pjesëmarrësit që ekpozojnë produkte të hotelerisë dhe gastronomisë.
Në hapje të panairit ishte edhe lideri i AAK-së, Ramush Haradinaj, po nuk ka folur në ceremoninë e organizuar. Panairi do të jetë i hapur dy ditë./b.j/
