Nga Entela Canaj
Pas përfundimit të zgjedhjeve vendore dhe marrjes së detyrës nga kryebashkiakët e rinj, proces që pritet të mbyllet në shtator, qytetarët presin prej tyre të mbajnë premtimet e bëra në fushatë. Por sa besim kanë ata tek të zgjedhurit vendorë, dhe çfarë shohin si më problematike në qytetin dhe përditshmërinë e tyre?
Që nga punësimi, arsimi, shëndetësia, rrugët e shumë të tjera janë disa nga problemet për të cilat shqiptarët presin zgjidhje. Nga Lushnja, Tirana, Hasi, ja si përgjigjen qytetarët:
Studentët
Një studente nga Tirana thotë se problem për të është punësimi. Eshtë drejt përfundimit të studimeve dhe pyetja që i bën vetes çdo mëngjes është se ku do punojë pasi të marrë diplomën? “Unë shpresoj që ato premtime që ka bërë gjatë fushatës elektorale t`i mbajë. Tirana është metropol dhe problemet janë nga më të ndryshmet. Në çdo vend ku hedh sytë ka probleme pa fund: në rrugë, në punësim. Personalisht jam në shkollë, mbaroj për pak dhe shpresoj të gjej punë”, thotë një vajzë, studente nga Tirana.
Emigrantët e kthyer
Më e vështirë është situata për t`u pranuar nga emigrantët që janë kthyer të jetojnë në Shqipëri, pasi ata shohin probleme kudo ku hedhin sytë sepse bëjnë krahasim me vendin ku kanë jetuar. “Unë i kërkoj thjesht të kryej detyrat, të jetë i përgjegjshëm për popullin dhe për përgjegjësitë që ka marrë, të mbajë premtimet të paktën pjesërisht. Nuk mund të flas për një problem emergjent pasi këtu janë të gjitha për t`u zgjidhur. Unë kam jetuar edhe jashtë dhe nuk mund të bëhet krahasim; këtu nuk respektohet ligji, nuk ka kontroll, nuk ka ndërgjegjësim etj. Por sidomos ligji dhe drejtësia është problem i madh, Këtu njerëzit që punojnë në adminstratë sillen si ta kishin vendin e punës trashëgimi të prindërve. Edhe qytetarët kanë pjesën e tyre të mungesëës së ndërgjegjësimit, por për mendimin tim peshku gjihmonë nga koka qelbet, sepse nëse shteti nuk vë rregulla dhe nuk di t`i zbatojë atëherë edhe njerëzit do sillen sipas qeverisë që kanë në krye”, thotë një qytetar nga Tirana i cili sapo është kthyer nga emigrimi. 
Të rinjtë
Ndërsa një i ri nga Hasi, nuk beson se problemet e qytetit të tij zgjidhen me një mandat 4-vjeçar. Ai shton se në Shqipëri ende nuk ka ardhur momenti i zhvillimit të zgjedhjeve të lira dhe të ndershme, pasi shumë dëgjohet për blerje votash apo manipulime të tjera. “Kam votuar në këto zgjedhje. Jam nga Hasi, votova për kandidatin që mendova se ishte më i përshtatshëm, edhe pse ai nuk fitoi. Hasi ka mijëra probleme për t`u zgjidhur, dhe unë nuk besoj se do zgjidhen me një mandat 4-vjeçar të atij që ka fituar. Ç`është më e rëndësishmja unë nuk besoj në pastërtinë e zgjedhjeve pasi bëhen edhe shumë abuzime me vjedhje e blerje votash,” tha një djalë nga Hasi.
Fermerët
Ndërsa një qytetar nga Lushnja thotë se problemi më i madh për qytetin e tij është papunësia, e sidomos në Lushnjë ku duhet t`i jepet prioritet bujqësisë dhe fermerëve. “Presim shumë gjëra nga kryebashkiaku i ri dhe inshalla i realizoftë. Duhet që vëmendja të përqëndrohet sidomos tek familjet e varfra, pasi punësimi është problemi më i madh. Unë jam nga Lushnja dhe aty është problemi te tokat e Myzeqesë pasi duhen kanale vaditëse. Edhe gjatë fushatës i kemi diskutuar këto problem. Shumë premtime kanë dhënë, porse sa do i realizojnë nuk e di. Unë më tokën merrem nuk kam punë tjetër. Më ndihmon djali me emigracionin se ndryshe nuk do ja dilja. Ja konkretisht sot mu desh të bëja një skaner në spital dhe kushtonte 180 mijë lekë të vjetra, ku t`i gjeja. I lutem kryeministrit që t`i mbledh bashkiakët e rinj dhe t`u kërkojë që të bëjnë punë për popullin sdomos për ne fukarenjtë”, tha një qytetar nga Lushnja.
Kryebashkiakët e rinj
Kryebashkiakët e rinj të vendit, të dalë nga zgjedhjet e 21 Qershorit do të mund të nisin të ushtrojnë detyrën e tyre në fund të muajit shtator apo në fillim të muajit tetor. Të paktën kështu thonë ekspertët ligjorë që kanë analizuar procesin.
Premto Gogo nga Koalicioni i Vëzhguesve Vendorë thotë se mandati i kryebashkiakëve në detyrë zgjat deri me 15 shtator dhe vetëm pas kësaj date mund të nisë procesi i marrjes së detyrës e ushtrimit të funksioneve nga të zgjedhurit e rinj; kjo pasi pas përfundimit të numërimit të votave dhe shpalljes së fituesve, janë një serë procedurash që duhen ndjekur për kalimin e pushtetit te të zgjedhurit e rinj. /tesheshi.com/
