Legjenda e Barcelonës, Ksavi Hernandez, u largua me nder dhe krenari nga klubi katalanas.
Pas një karriere të suksesshme përgjatë 24 viteve si katalanas, 35-vjeçari u largua në Katar, ku do të angazhohet me ekipin Al Sad. Gjatë një interviste për uebsajtin e Barcelonës, Ksavi i shpreh mirënjohje klubit, drejtuesve, si dhe i trembet se Mesi dhe Iniesta mund të thyejnë rekordet e tij.
“Unë mund të largohesha nga Barcelona pa titull dhe pa eufori. Disa njerëz mendojnë se kur nuk fiton asgjë, duhen shitur 10 lojtarë. Barcelona nuk bën gabime, prandaj ne qëndruam të bashkuar dhe fituam gjithçka. Barcelona është klubi i jetës sime. Jam krenar që isha pjesë e saj dhe që ndërtova një karrierë të suksesshme”, nënvizon Ksavi, i cili u largua pas 24 vitesh nga Barcelona. 11 vite ai u stërvit në akademinë “La Masia” dhe e mbylli me tripletë, duke qenë një nga lojtarët që ka fituar çdo trofe të mundshëm si në konkurrencën mes klubesh dhe kombëtaresh.
“Isha i lumtur që qëndrova edhe një vit. Ish-drejtori sportiv Zubizarreta, trajneri Luis Enrike dhe Bartomeo folën dhe diskutuan shumë me mua. Ishte e qartë që doja të ikja. Por, ata më bindën dhe u jam mirënjohës”.
Për sa u përket rekordeve dhe titujve, ylli spanjoll nënvizon: “Unë e di që dikush do të më kalojë, ndoshta Iniesta apo Leo Mesi. Jam i lumtur me karrierën time, pasi mbaj mbi shpatulla aq shumë histori dhe tituj, sa t’u tregoj fëmijëve dhe nipërve çdo ditë nga një gjë të re”. /tesheshi.com/
